Zelensky takoi Streeting: Goditja e urës së Krimesë, përgjigje e drejtë

Presidenti ukrainas Volodymyr Zelensky e ka justifikuar sulmet e përsëritura të Kievit ndaj një ure kyçe që lidh Rusinë me Krimenë e pushtuar, duke i quajtur ato një “përgjigje të drejtë” ndaj 109 sulmeve të veçanta ruse mbi ura në Ukrainë, shkruan BBC.

Në një prononcim për BBC-në në Kiev, Zelensky tha se sulmet intensive të Rusisë ndaj Ukrainës, të cilat pasuan goditjet ndaj Urës së Krimesë, janë thjesht një “sinjal se Vladimir Putini nuk dëshiron të ndalet. Ai kërkon një pretekst për të përshkallëzuar situatën”.

Ai hodhi poshtë pretendimin e presidentit rus se ura – e cila lidh Rusinë me gadishullin që ajo e aneksoi ilegalisht nga Ukraina – shërbente “ekskluzivisht për qëllime civile”.

“Ka fakte, jo vetëm fjalët e Putinit. Ne mund t’i shohim ato,” tha ai.

Presidenti ukrainas iu referua pamjeve në internet, ku shfaqen tanke dhe pajisje të tjera ushtarake ruse që e përdorin këtë rrugë nga Rusia drejt Krimesë së pushtuar, si një linjë furnizimi dhe për nevoja logjistike.

“Nëse Putini do ta përdorte internetin, do të mund ta shihte këtë.”

Presidenti ukrainas shtoi se Rusia ka kryer sulme me raketa dhe dronë ndaj urave në Ukrainë.

Sulmet e kombinuara me raketa dhe dronë gjatë kësaj jave shkatërruan segmentin qendror rrugor të Urës së Krimesë, duke bërë që një pjesë e saj, së bashku me një nga dy harqet mbështetëse, të shembet në det, gjë që e ka bërë strukturën të papërdorshme për trafikun rrugor.

Sulmet ruse ndaj Ukrainës vazhduan të premten në mbrëmje dhe gjatë natës: një djalë shtatëvjeçar mbeti i vrarë nga sulmet me raketa dhe dronë në Kryvyi Rih qytetin e lindjes së Zelenskyt, në rajonin qendror të Dnipropetrovskut. Zyrtarët vendas bëjnë të ditur se, në momentin e sulmit, fëmija ndodhej në një kënd lojërash.

Gjithashtu, humbi jetën një punonjëse mjekësore 20-vjeçe. Një zyrtar vendas shtoi se, në momentin kur ekipet e shpëtimit mbërritën në vendngjarje, i njëjti vend u godit sërish nga dronë me motor reaktiv. Në qytet mbetën të plagosur edhe 58 persona të tjerë.

Shërbimi Shtetëror i Emergjencave të Ukrainës (DSNS) njoftoi se 11 persona u plagosën në rajonin verilindor të Kharkiv-it, ndërsa një person tjetër u plagos në Rivne, në veriperëndim të vendit.

Rusia nisi pushtimin e plotë të Ukrainës në shkurt të vitit 2022.

Zelensky foli para një takimi në Kiev me Sekretarin e Mbrojtjes të Mbretërisë së Bashkuar, Wes Streeting, i cili i tha presidentit ukrainas se ndodhej aty për të treguar se Evropa është e bashkuar në mbështetjen e saj.

“Sa më shumë që Putini përpiqet të na përçajë, aq më të vendosur bëhemi ne,” tha Streeting.

Ai u shpreh se goditja e Polonisë nga raketat ruse të premten, gjatë ushtrimeve ushtarake të të ashtuquajturës “Koalicion i të Vullnetshmëve”, përbënte një “provokim skandaloz”.

Sipas Streeting, koha kur ndodhi kjo dukej “më shumë se një rastësi”.

I pyetur nga BBC-ja lidhur me reagimin e NATO-s, ai u shpreh se mënyra më e mirë do të ishte “të bëhet më shumë për Ukrainën”, në mënyrë që ajo të mbrohet nga Putini, të cilin ai e quajti një “vrasës gjakftohtë”.

Përshkrimi që Streeting i bëri Putinit përputhej me komentet e bëra më herët nga Zelensky, i cili e quajti liderin e Kremlinit “vrasës”. Kjo erdhi si përgjigje ndaj deklaratës së presidentit amerikan Donald Trump, i cili këtë javë e quajti Putinin “mikun” e tij.

Vizita e Streeting në Kiev erdhi pasi liderët evropianë, të cilët u takuan të enjten në Berlin së bashku me të dërguarit amerikanë, deklaruan se janë të gatshëm për negociata me Moskën për t’i dhënë fund luftës në Ukrainë.

“Evropa ka një qëndrim negociues të qartë, të qëndrueshëm dhe të unifikuar,” tha kryeministri i Mbretërisë së Bashkuar, Andy Burnham, ndërsa kancelari gjerman Friedrich Merz theksoi se “kërkesat maksimaliste” të Moskës nuk janë realiste.

Jared Kushner, dhëndri i Donald Trumpit dhe një nga dy të dërguarit amerikanë të pranishëm në Berlin, tha se presidenti amerikan – i cili iu bashkua takimit edhe përmes një lidhjeje telefonike nga avioni presidencial “Air Force One” – dëshiron të arrijë një marrëveshje me Moskën “duke pasur Evropën në krah”.

Deri më tani, Vladimir Putini i Rusisë e ka refuzuar çdo rol të Evropës në bisedimet e paqes të udhëhequra nga SHBA-ja; megjithatë, në fillim të kësaj jave, ai i ftoi përfaqësuesit evropianë në Moskë, me qëllim për të sqaruar se “çfarë do të sjellë Evropa në këto bisedime”.

Ky takim në kryeqytetin gjerman u zhvillua pak orë pasi Putini kishte marrë pjesë në bisedime historike trepalëshe në Shenzhen të Kinës, së bashku me Trumpin dhe presidentin kinez Xi Jinping.

Zelensky tha se kishte qenë “skeptik” para raundit të fundit të bisedimeve, kur të dërguarit amerikanë pretenduan se Rusia ishte e gatshme të bënte kompromise për t’i dhënë fund luftës.

“Mendoja se [Putini] do të gjente një arsye për ta përshkallëzuar situatën.”

Në një prononcim për BBC-në, Streeting shtoi: “Putini nuk ka absolutisht asnjë të drejtë të hiqet si viktimë. Ai është agresori në këtë luftë. Ai nxiti një pushtim të paligjshëm të Ukrainës. Dhe të gjithë ne, në mbarë botën, duhet ta gjykojmë Putinin jo bazuar në fjalët e tij, por në veprimet e tij.”

Në një zhvillim të veçantë të shtunën, Finlanda njoftoi se ka “diktuar një sulm me dron ndaj një anijeje tregtare ruse” në pjesën lindore të Gjirit të Finlandës, “në një zonë detare ndërkombëtare”.

Ministria finlandeze e Mbrojtjes deklaroi se anija është dëmtuar, pa dhënë detaje të mëtejshme.

Ajo shtoi se, për arsye sigurie, janë rivendosur “kufizime të përkohshme në hapësirën ajrore dhe zonat detare në pjesën lindore të Gjirit të Finlandës”.

Rusia nuk ka bërë ndonjë koment publik lidhur me këtë çështje.

UkrainaVladimir Zelenski (Volodymyr Zelenskyy)