Qeveria e Maqedonisë së Veriut sot e ka vazhduar gjendjen e krizës për shkak situatës me zjarret në hapësirat publike në krejt territorin e vendit, transmeton Portalb.mk.
Në lidhje me gjendjen e jashtëzakonshme me zjarret, në këtë seancë u ndanë edhe 52 milionë denarë nga rezervat shtetërore për Drejtorinë për Mbrojtje dhe Shpëtim. Në këtë buxhet, janë përfshirë edhe 10.5 milionë denarë për strehimin, ushqimin dhe transportin e personelit të ardhur nga shtetet e huaja.
Qeveria vendosi të anulojë vendimin e qeverisë se kaluar në lidhje me rritjen e tarifave te shërbimet e noterëve. Qeveria e kaluar më 6 qershor e kishte marrë këtë vendim, i cili do të ngarkonte shpenzimet e qytetarëve.
Këtë vendim e kishte paralajmëruar ministri i drejtësisë, Igor Filkov, si një vendim i marrë nga paraardhësi i tij në këtë ministri, Krenar Lloga. Ai e kishte vlerësuar këtë vendim si të fshehtë dhe të dëmshëm për qytetarët, duke alarmuar që planifikohej rritja e çmimeve për 10 herë.
Ndryshe, për shkak të zjarrit në mes të korrikut, Qeveria e Maqedonisë së Veriut më 14 korrik e kishte shpallur gjendjen e krizës për 30 ditë dhe kërkoi ndihmë përmes mekanizmit të BE-së në fushën e mbrojtjes civile. Gjithashtu, është vënë ndalesë e plotë e lëvizjes në pyje dhe toka pyjore në territorin e menaxhuar nga NP “Pyjet Kombëtare”, i cili do të zgjasë deri në ditën e shfuqizimit të tij, në periudhën nga ora 06:00 deri në orën 20:00.
- LEXO: Sllovenia dërgoi helikopter në Maqedoninë e Veriut për të ndihmuar në shuarjen e zjarreve
- LEXO: Ministri Filkov do të anulojë vendimin e ish-ministrit Lloga në lidhje me rritjen e çmimeve te shërbimet e noterit