Në natën e tretë të Festivalit Ndërkombëtar të Teatrit në Tetovë, mbrëmë para publikut u paraqit Teatri Kombëtar Eksperimental i Tiranës me shfaqjen “Big Baby”, shkruan Portalb.mk.
Liz, një grua në të 40-tat, bën një jetë si gjithë të tjerët, derisa, një ditë, i shfaqet në derë Aleksi, një djalë 26-vjeç, i cili pretendon se është i biri. Mirëpo ajo nuk ka asnjë djalë. Ose më saktë, e ka patur një para 26 vitesh, të cilin ka dashur ta quaj Aleks, por e ka abortuar.
Ngjarjet ngatërrohen edhe më shumë kur Aleksi bie në dashuri me Deizin, fqinjën e Lizit, e cila këmbëngul se është shoqe e ngushtë me N.Kidman dhe S.Spielberg. Përmes humorit të komedisë së zezë, dialogut emocional dhe psikologjik, “Big Baby” e Frank Moher na fton të shohim tre individë të parritur emocionalisht dhe me nevojën për të patur dikë pranë. Një tekst inteligjent dhe i hidhur, ku humori dhe trishtimi ecin paralelisht.
Me këtë produksion, festivali vazhdoi programin e tij artistik që gjatë këtyre ditëve po sjell në Tetovë trupa dhe shfaqje teatrore nga vendi dhe rajoni.
Programi vazhdon sonte me shfaqjen “Vetmi në Perëndim” nën regji të Afeida Boriçit nga Teatri i Qytetit të Preshevës.
Drama zhvillohet në një fshat të vogël në Llenan, në perëndim të Irlandës. Qendra e ngjarjes është marrëdhënia e trazuar mes dy vëllezërve, Colman dhe Vallin, të cilët sapo kanë humbur babanë e tyre. Në vend që humbja t’i afrojë, ata përfshihen në grindje të pafundme për trashëgiminë, kufijtë e shtëpisë dhe çdo detaj të jetës së përbashkët.
Një prift i ri, Roderik Walsh, përpiqet me dëshpërim t’i pajtojë, ndërsa edhe ai vetë është i zhytur në krizë personale dhe ndjen faj për vetëvrasjet dhe vrasjet që ndodhin në atë fshat.
Kjo dramë është njohur për dialogun e mprehtë, humorin e errët dhe mënyrën se si flet për plagët shoqërore përmes një historie intime familjare.
Nesër, më 5 tetor, para publikut tetovar do të paraqitet Teatri Kombëtar i Kosovës me shfaqjen “Litari”.
Festivali do të përmbyllet më 6 tetor me shfaqjen “Zotëriu i parë” të Teatrit Shqiptar të Shkupit.
Të gjitha shfaqjet mbahen në Pallatin e Kulturës në Tetovë, me fillim nga ora 20:00.
Festivali Ndërkombëtar i Teatrit në Tetovë synon të sjellë para publikut krijimtarinë teatrore nga hapësira shqiptare dhe rajoni, si dhe të krijojë një hapësirë takimi e shkëmbimi mes artistëve, regjisorëve dhe aktorëve pjesëmarrës.