Rektorët e universiteteve shtetërore në vend sot nënshkruan memorandum bashkëpunimi me Agjencinë për Inovacion, Zhvillim Shkencor dhe Teknologjik dhe Sipërmarrje (INOVA), i cili duhet të përmirësojë bashkëpunimin midis komunitetit shkencor dhe kërkimor dhe institucioneve me qëllim nxitjen e inovacionit, mbështetjen e sipërmarrjes dhe startup-eve, si dhe zhvillimin e një ekonomie konkurruese, transmeton Portalb.mk.
Memorandumi i bashkëpunimit u nënshkrua solemnisht sot në Qeveri nga rektorët/prorektorët e universiteteve publike dhe drejtoresha e INOVA-s, Daniela Dimovska, ndërsa për rëndësinë e iniciativës folën në fjalimet e tyre para të pranishmëve kryeministri Hristijan Mickoski dhe ministrja e Arsimit dhe Shkencës Vesna Janevska.
Mickoski tha se memorandumi është një hap i rëndësishëm drejt lidhjes më të mirë të arsimit, shkencës dhe ekonomisë, e cila, siç tha ai, është e nevojshme në kushtet e ndryshimeve të shpejta globale.
“Memorandumi dërgon një mesazh të fortë se përmes partneritetit mund të krijojmë kushte për zhvillimin e sipërmarrjes, për mbështetjen e startup-eve, për rritjen e konkurrueshmërisë së kompanive tona dhe për ndërtimin e një ekonomie të bazuar në njohuri. Është veçanërisht e rëndësishme që kjo iniciativë të hapë hapësirë për bashkëpunim më të thellë midis universiteteve, institucioneve dhe sektorit të biznesit, i cili mund të rezultojë në projekte të reja, kërkime të përbashkëta dhe krijimin e zgjidhjeve me zbatim real. Në këtë mënyrë, krijohen kushte për mbajtjen e talenteve të reja dhe përfshirjen e tyre aktive në zhvillimin e ekonomisë vendase”, tha Mickoski dhe shtoi se fokusi i partneritetit është në përputhje me prioritetet strategjike të Qeverisë.
Kryeministri pret që përmes aktiviteteve të përbashkëta të përmirësohet ekosistemi i inovacionit dhe teknologjisë, të inkurajohet fryma sipërmarrëse tek të rinjtë dhe të krijohen mundësi të reja për zhvillim dhe rritje.
Ministrja e Arsimit Vesna Janevska theksoi se nënshkrimi i memorandumit nuk është formalitet, por konfirmim i vendosmërisë së përbashkët për një marrëdhënie dhe bashkëpunim edhe më të fortë midis shtetit dhe universiteteve.
Memorandumi u nënshkrua nga rektorët e Universitetit të Shën Kirilit dhe Metodit, Universitetit Shtetëror të Tetovës, Universitetit të Goce Dellçevit në Shtip, Universitetit të Evropës Juglindore në Tetovë, Universitetit të Shën Klimentit të Ohrit në Manastir, Universitetit të Shën Palit Apostull në Ohër dhe Universitetit të Nënë Terezës në Shkup. Ata e mirëpritën iniciativën dhe shprehën pritjet e tyre që përfitimet dhe rezultatet e partneritetit me INOVA-n do të jenë të dukshme së shpejti.