Më 22 tetor, duke filluar nga ora 20:00, në skenën e Operës dhe Baletit Nacional do të shfaqet baleti “Zonja me kamelie”, një histori emocionale skenike për dashurinë, pasionin dhe sakrificën, e treguar përmes fuqisë së vallëzimit dhe muzikës nga Xhuzepe Verdi, shkruan Portalb.mk.
E frymëzuar nga historia e famshme e Margaritës dhe Armandit, shfaqja përcjell fatin e dashurisë së dy personazheve kryesorë në skenën e baletit. Muzika e Verdit, e njohur për bukurinë e saj melodike dhe ngarkesën e fortë emocionale, plotëson dramaturgjinë dhe thellon historinë e dashurisë, sakrificës personale dhe kufizimeve shoqërore.
Shfaqja do të dirigjohet nga Eduard Ambarcumjan nga Armenia, ndërsa koreografia është nga Vasili Medvedev, një nga koreografët e shquar rusë, i cili bashkëpunon me teatrot kryesore të baletit, përfshirë “Bolshoi’ në Moskë dhe “Mariinski” në Shën Petersburg. Skenografia dhe kostumografia janë vepër e Pavol Jurash nga Sllovakia, ndërsa koncert-mjeshtre është Verica Lambevska.
Rolet kryesore të Margaritës dhe Armanit do të interpretohen nga Marija Kiçevska Shokarovska dhe Francisko Himenez Ruiz nga Spanja, së bashku me solistët, ansamblin e baletit dhe orkestrën e Operës dhe Baletit Nacional.
“Zonja me Kamelie” sjell në jetë një histori dashurie të përjetshme përmes elegancës së shprehjes baletike dhe fuqisë së emocioneve skenike.