Shoqata kryesore ndërkombëtare e studiuesve të gjenocidit ka miratuar një rezolutë duke thënë se janë përmbushur kriteret ligjore për të vërtetuar se Izraeli po kryen gjenocid në Gaza, tha presidenti i saj të hënën, transmeton AlbanianPost.
Tetëdhjetë e gjashtë për qind e atyre që votuan midis 500 anëtarëve të Shoqatës Ndërkombëtare të Studiuesve të Gjenocidit mbështetën rezolutën, e cila deklaron se “politikat dhe veprimet e Izraelit në Gaza përmbushin përkufizimin ligjor të gjenocidit në Nenin II të Konventës së Kombeve të Bashkuara për Parandalimin dhe Ndëshkimin e Krimit të Gjenocidit (1948)”.
Dy organizata izraelite për të drejtat e njeriut, B’Tselem dhe Physicians for Humans Rights – Israel, pretenduan në fund të muajit korrik se Izraeli po kryente “gjenocid” në Rripin e Gazës, bazuar në hetimet që kryen.
“Asgjë nuk të përgatit për të kuptuar se je pjesë e një shoqërie që po kryen gjenocid. Ky është një moment thellësisht i dhimbshëm për ne”, tha Yuli Novak, drejtoreshë ekzekutive e B’Tselem, në një deklaratë të lëshuar së bashku me një konferencë për shtyp në Jerusalem.
Raporti nga organizata e saj, një institucion më shumë se 35-vjeçar, përpilon një studim të dëshmive, statistikave dhe ngjarjeve në politikën izraelite gjatë “më shumë se 20 muajve”.
“Rishikimi i politikës izraelite në Rripin e Gazës dhe pasojat e saj të tmerrshme, si dhe deklaratat e zyrtarëve të lartë politikë dhe ushtarakë izraelitë në lidhje me objektivat e sulmit, na çojnë në përfundimin e qartë se Izraeli po ndërmerr veprime të koordinuara që synojnë shkatërrimin e qëllimshëm të shoqërisë palestineze në Rripin e Gazës”, thuhet në këtë hetim.
Gjykata Ndërkombëtare Penale (GJNP), një gjykatë e përhershme e ngarkuar me ndjekjen penale dhe gjykimin e individëve të akuzuar për gjenocid, krime kundër njerëzimit dhe krime lufte, ka lëshuar urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes, Yoav Gallant, sepse ajo i dyshon ata për krime lufte dhe krime kundër njerëzimit.
Afrika e Jugut ka nisur gjithashtu procedurat para Gjykatës Ndërkombëtare të Drejtësisë (GJND) e cila akuzon Izraelin për kryerjen e “gjenocidit” në Rripin e Gazës.