Fronti Opozitar i udhëhequr nga Bashkimi Demokratik për Integrim së bashku me partitë tjera, ka vendosur që në xhiron e dytë mos të përkrahin asnjë kandidat për president, transmeton Portalb.mk.
“Qytetarët të vendosin vet se si do të shfrytëzojnë të drejtën e votës në zgjedhjet presidenciale”, deklaruan nga Fronti Evropian.
Liderët e subjekteve politike në Frontin Evropian këtë vendim e shpalosën pas takimit të realizuar në Strugë, ku vlerësuan se dallimi mes Frontit dhe VLEN-it do të rritet akoma më shumë në raundin e dytë.
“Fronti Europian nuk është më pjesë e garës presidenciale në raundin e dytë të zgjedhjeve presidenciale dhe meqenëse vota e qytetarëve për ne është e shenjtë dhe e drejtë e tyre, Fronti Europian konstaton se është e vullnetin ekskluziv të qytetarëve se si do ta shfrytëzojnë këtë të drejtë”, raportoi Fronti.
Rrethi i dytë i zgjedhjeve presidenciale do të mbahet me 8 maj së bashku me zgjedhjet parlamentare.