Me 65 vota “pro” Kuvendi sot miratoi me procedurë të shkurtuar Ligjin për huamarrjen të Republikës së Maqedonisë së Veriut me kredi prej gjysmë miliardë eurosh nga qeveria hungareze. “Kundër” ligjit votuan 15 deputetë dhe nuk pati asnjë “abstenim”, transmeton Portalb.mk.
Gjatë diskutimit që i parapriu votimit, LSDM-ja opozitare akuzoi se marrëveshja për kredinë është bërë me dyer të mbyllura, me qëllime të dyshimta dhe se sjell pasoja të mëdha politike dhe ekonomike duke rritur borxhin publik.
Deputetët e LSDM-së paraprakisht deklaruan se do të votojnë kundër ligjit të propozuar nga Qeveria e Maqedonisë.
Kryetari i partisë më të madhe opozitare, Venko Filipçe, javën e kaluar kërkoi që qeveria ta tërheqë projektligjin për huamarrjen e shtetit nga qeveria hungareze pas një procedure të shkurtuar dhe kërkoi që ai të bëhet objekt i një debati të gjerë publik.
“Në vetë ligjin dallohen qartë nene dhe elementë që konfirmojnë korrupsionin enorm. Duam të theksojmë disa pika kyçe të ligjit që konfirmojnë korrupsionin dhe biznesin e fshehtë me këto para. Më e rëndësishmja, për këtë huazim është rënë dakord kur VMRO-DPMNE ishte në opozitë, tërësisht joinstitucionale dhe private. Ashtu siç është miratuar ligji atëherë, jashtë të gjitha procedurave, ashtu edhe tani Qeveria kërkon ta kalojë pa asnjë debat dhe analizë. LSDM e konsideron këtë skandal”, tha Filipçe më 12 shtator.
Sipas VMRO-DPMNE-së, megjithatë, procedura është transparente, dhe ligji do të sjellë para të reja në ekonominë e Maqedonisë dhe do të ndihmojë në zhvillimin e komunave duke mbështetur projekte.
Kryetarja e Komisionit parlamentar për financim dhe buxhet, Sanja Llukarevska, e cila vjen nga radhët e LSDM-së, refuzoi të caktojë seancë të këtij trupi parlamentar, ku do të vinte në rend dite pikën për votimin e ligjit në Kuvend. Për këtë ka ndërhyrë kryeparlamentari Afrim Gashi, i cili caktoi seancën e komisionit, ndërsa seancën e drejtoi deputeti nga radhët e VMRO-DPMNE-së, Bojan Stojanovski.
Deputetët e LSDM-së nuk kanë marrë pjesë në seancën e komisionit.
Deputeti i opozitës Fatmir Bytyqi në seancën e Kuvendit tha se shteti do të jetë borxhli dhe do t’i paguajë komisione një kompanie që nuk do ta zgjedhë vetë. Ai akuzoi se do të ketë gjithashtu “kosto të fshehura për të cilat ne dëgjojmë pak ose aspak”.
Sipas tij, kjo kredi lë hapësirë për manipulime politike dhe korrupsion dhe huadhënësit e huaj mund të vendosin kushte që do të jenë të pafavorshme për Maqedoninë e Veriut dhe do të ndikojnë në politikat e brendshme dhe të jashtme të shtetit.
“Banka hungareze ka një histori financimi të projekteve që devijojnë nga korpusi i vlerave europianoperëndimore. Shtrohet pyetja nëse e njëjta gjë do të ndodhë në vendin tonë dhe nëse do të detyrohemi të bëjmë lëshime politike për këtë kredi, nëse do të ndikojmë nga agjenda të politikës së jashtme që nuk janë në përputhje me vlerat demokratike të shoqërisë sonë”, tha Bytyqi.
Sipas ligjit të miratuar, kredia prej 500 milionë eurosh nga Banka Hungareze e Eksport-Importit, një kompani private me përgjegjësi të kufizuar, do të tërhiqet në një këst. Afati i shlyerjes është 15 vjet, me një periudhë mospagimi prej tre vitesh, dhe norma e interesit është fikse në 3.25 përqind. Ajo do të shlyhet me 24 këste gjashtëmujore, në datat 15 shkurt dhe 15 gusht të çdo viti.
Ligji parashikon që Maqedonia e Veriut i paguan Bankës Hungareze të Eksportit-Importit një komision për fondet e patërhequra në shumën prej 0.5 përqind të kredisë në vit. Komisioni për fondet e patërhequra do të llogaritet në baza ditore mbi pjesën e patërhequr të kredisë, e llogaritur nga data e disponueshmërisë së fondeve dhe do të paguhet në ditën e parë të punës pas përfundimit të periudhës së disponueshmërisë.