Përshkallëzim i madh i konfliktit në Lindjen e Mesme. Më 28 shkurt, SHBA-Izrael nisën një sulm të përbashkët “parandalues” ndaj objektivave në Iran.Sulmet, sipas raportimeve, kanë shkaktuar mbi 1 mijë viktima në Iran dhe gjatë tyre u vra edhe udhëheqësi suprem Ali Khamenei. Konflikti tashmë ka hyrë në ditën e 7-të dhe përfshin disa fronte në rajon, raporton Klan.
Izraeli ka kryer sulme të reja ndaj Teheranit dhe Beirutit, ndërsa Irani thotë se ka lëshuar raketa drejt Tel Aviv. Gjatë natës janë raportuar sulme në disa vende të Lindjes së Mesme, përfshirë Libanin dhe Bahrein. Sipas UNICEF, të paktën 190 fëmijë janë vrarë në rajon pas sulmeve, 181 prej tyre në Iran. SHBA-të paralajmërojnë intensifikim të sulmeve, por pa trupa tokësore.
Pavarësisht luftës, Arabia Saudite konfirmon stabilitetin e saj financiar
Ministria e Financave e Arabisë Saudite thotë se pozicioni fiskal i mbretërisë është i fortë dhe se ka akses në disa rrugë eksporti, përfshirë Detin e Kuq, një javë pas fillimit të luftës SHBA-Izrael kundër Iranit, raporton Al Jazeera.
“Aktiviteti ekonomik në të gjithë Arabinë Saudite vazhdon të funksionojë normalisht“, tha një zëdhënës i ministrisë në një deklaratë që iu referua “zhvillimeve të fundit”, por nuk përmendi drejtpërdrejt konfliktin.
“Ne vazhdojmë të vlerësojmë në mënyrë të vazhdueshme treguesit ekonomikë dhe fiskalë, dhe të dhënat aktuale konfirmojnë se pozicioni ynë fiskal dhe perspektiva afatmesme mbeten të qëndrueshme”, shtoi në deklaratë.