Më 16 dhe 17 qershor do të mbahet ngjarja tradicionale “Takimet Poetike në Sharr” ku do të tubohen poetë nga vendi dhe rajoni për të pasuruar dy ditët festive.
Në ditën e parë, do të përkujtohen dhe nderohen me vendosje të luleve te përmendoret që gjenden para shkollës fillore në Shipkovicë të Tetovës në nder të Rexhep Vokës – shkrimtar i Rilindjes Kombëtare, Sadudin Gjurës, poet dhe dramaturg i martirizuar nga pushteti jugosllav- komunist dhe Xhemil Abduramanit, dëshmori i kombit .
Manifestimi qendror do të mbahet më 17 qershor, në ora 16.00, në qendrën e vjetër historike “ARABATI BABA TEQE” Tetovë.
Si zakonisht, poetët do të lexojnë poezitë autoriale, do të ndahen mirënjohje për pjesëmarrësit si dhe çmime për poezitë më të mira. Megjithatë, qëllimi i këtij takimi nuk është gara, sa është afrimi dhe vënia e kontakteve mes krijuesve që shkruajnë në gjuhën e njëjtë dhe i shërbejnë një letërsie amë.
Ndonëse edicioni i sivjetmë realizohet me një buxhet jashtëzakonisht të vogël profesori Ejup Ajdini, theksoi për Portalb.mk se ata vendosën ta mbajnë këtë ngjarje për të mos e humbur vazhdimësinë e këtyre takimeve dhe kërkoi mirëkuptim për çdo lëshim të mundshëm.
Këto takime janë trajta më e mirë e urave dhe bashkëpunimeve mes intelektualësh që për shkas marrin poezinë. Javë më parë një grup poetësh ishin pjesëmarrës në një aktivitet në Përmet që e organizon poeti Ligor Shyti për nder të rilindasit Naim Frashëri. Kujtojmë se rëndësia e këtyre aktiviteteve është e madhe dhe duhen mbështetur nga ministritë e kulturës së tre vendeve, pse jo edhe ministrive tjera.
Komisioni i shoqatës “MENADA” javë më parë shpalli njoftimin për të drejtën e konkurrimit të poetëve dhe më pas me ndihmën e një komisioni të brendshëm përcaktoi listën e poetëve – poeteshave pjesëmarrëse që përbëhet nga emrat:
- Baki Imeri – Rumani
- Besim Xhelili – Austri
- Ismail Ilazi – Itali
- Flora Brovina – Prishtinë
- Salajdin Saliu – Tetovë
- Agim Bajrami – Durrës
- Adelina Xhaferi – Gostivar
- Ligor Shyti – Përmet
- Sllavica Dabevska – Tetovë
- Nurie Emrullai =- Kërçovë
- Daim Ilazi – Tetovë
- Flora Peci – Mitrovicë
- Arjan Kallço – Korçë
- Janaq Jano – Përmet
- Sadije Aliti – Tetovë
- Daim Miftari Shkup
- Drita Syla -Besjanë
- Shqipe Asani Prishtinë
- Fatos Rushiti – Kumanovë
- Ilirida Ismaili – Prishtinë
- Kaltrinë Uka – Mitrovicë
- Valdete Dulahu – Tetovë
- Ramë Oraca – Podujevë
- Selvete Abdullahu – Gjilan
- Erona Mehmeti- Mitrovicë
- Ylltare – Ferati- Prishtinë
- Farida Ramadani – Shkodër
- Bojana Xhindolli – Lushnje
- Vjollcë Berisha – Tetovë
- Asllan Qyqalla- Prishtinë
- Arlind Farizi – Tetovë
- Ilaz Osmani -Tetovë
- Bajramali Selimi – Gostivar
- Sunaj Rahimi- Kumanovë
Janë të mirëseardhur të gjithë adhuruesit e poezive dhe poetëve pjesëmarrës.