Parlamenti Evropian, Këshilli i Bashkimit Evropian dhe Komisioni Evropian kanë fituar Çmimin e Avokatit të Popullit për vitin 2026 në kategorinë e “ekselencës në administratën e hapur” për mjetin EU Law Tracker, njoftoi Parlamenti Evropian, transmeton Portalb.mk.
Çmimi nderon projektet nga institucionet, organet ose agjencitë e BE-së që promovojnë administratën e mirë dhe kanë ndikim pozitiv në jetën e qytetarëve.
EU Law Tracker është mjet online që bashkon informacionin kryesor legjislativ në një vend. Ai u zhvillua nga të tre institucionet në bashkëpunim me Zyrën e Publikimeve.
Me anë të këtij mjeti, qytetarët mund të ndjekin miratimin e ligjeve evropiane nga fillimi në fund nëpërmjet një afati kohor dhe të kenë qasje direkt në dokumentet përkatëse.
Qëllimi është që procesi i ligjvënies evropiane të bëhet më transparent, i hapur dhe i arritshëm, thuhet në deklaratë.
Nga 30 prilli 2024, versioni pilot i EU Law Tracker siguron pasqyrë të plotë të procedurave të zakonshme legjislative, të cilat janë mënyra kryesore në të cilën miratohen ligjet e BE-së.
Mjeti gjithashtu ofron një funksion kërkimi të personalizueshëm, si dhe përditësime në kohë reale mbi zhvillimet e reja dhe dokumentet e publikuara së fundmi.
Gjithashtu përfshin Gjurmuesin e Deklaratave të Përbashkëta, i cili gjurmon propozimet që bien nën Deklaratën e Përbashkët të vitit 2026 mbi Prioritetet Legjislative.
Sipas njoftimit, pas finalizimit teknik në fund të vitit 2025 dhe fillim të vitit 2026, mjeti tani është plotësisht funksional dhe po zbatohet në të gjitha gjuhët zyrtare të BE-së.