Shoqata për promovimin dhe zhvillimin e shoqërisë përfshirëse “Inkluziva” në Kumanovë u bëri thirrje prindërve të fëmijëve me aftësi të veçanta nga Kumanova që të aplikojnë për shërbime falas për punë në zhvillimin dhe përvetësimin e aftësive jetësore, edukative, sociale dhe kulturore përmes punës individuale dhe në grupe, transmeton Tv24.mk.
Për këtë qëllim shoqata “Inkluziva” ka angazhuar defektologë dhe logopedë të cilët do të punojnë me fëmijët në përvetësimin e aftësive të ndryshme.
“Inkluziva” projektin e realizon me mbështetjen e Komunës së Kumanovës, përmes sektorit për mbrojtje sociale, dhe i referohet punës individuale dhe në grupe me fëmijët me aftësi të veçanta nga mosha pesë deri në dymbëdhjetë vjeç.
“Kemi një numër të madh aktivitetesh, aktualisht po zhvillojmë intervista me profesionistë dhe tashmë tre prej tyre, dy logopedë dhe një defektolog, do të angazhohen nga 1 shtatori. Në projekt është parashikuar blerja e materialeve për punë me fëmijët dhe pajisjeve, por kemi edhe një pjesë të vogël të punimeve ndërtimore, përkatësisht përshtatjen e hapësirës së oborrit sipas standardeve. Sapo të blihen dhe të vendosen pajisjet, do të fillojmë të formojmë grupe pune sipas nevojave të fëmijëve dhe orari do të përshtatet sipas nevojave të prindërve, kështu mund të punojmë me dy turne. Si një nënë e djalit të rritur me aftësi të veçanta, kam parasysh që në disa familje të dy prindërit janë të punësuar dhe kur ata të kenë kohë të lirë do të vijnë këtu”, tha kryetarja e shoqatës, Bllagica Dimitrovska.
Ajo theksoi, se përveç punës individuale me logoped, edukator dhe rehabilitues special, sipas vlerësimit fillestar të fëmijës, do të angazhohen edhe profesionistë të tjerë nëse fëmija ka nevojë për lloj tjetër mbështetjeje.
Në kuadër të projektit janë parashikuar edhe aktivitete sociale, vizita në ekspozita, koncerte, teatër. Gjithashtu do të përfshihen edhe prindërit, të cilëve do t’iu ofrohet mbështetje psiko-sociale.
“Po ashtu, ne i telefonuam prindërit, dhe brenda një dite u regjistruan prindërit e tetë fëmijë me aftësi të veçanta. Ne do të fillojmë fillimisht me një grup më të vogël prej dhjetë, dhe më tej. Organizuam edhe një ngjarje informative me përfaqësues të shkollave”, tha Dimitrovska.
Ndërsa më 13 gusht të këtij viti, Komuna e Kumanovës ndau gjithsej tre milionë denarë për pesë shoqata qytetare që aplikuan në thirrjen publike për mbështetje financiare në fushën e mbrojtjes sociale. “Inkluziva” ka marrë 1.150.000 denarë për një qendër ditore ku ofrojnë punë individuale me fëmijët me aftësi të kufizuara.