Nga mesnata, karburantet do të shiten me çmime të reja, vendosi sot Komisioni Rregullator për Energjetikë, transmeton Portalb.mk.
Benzinat shtrenjtohen për 3,5 denarë, ndërsa dizeli lirohet për 2 denarë.
Me këtë, çmimi i ri i Eurosuper BS-95 do të jetë 100,50 denarë për litër, ndërsa Eurosuper BS-98 do të shitet për 102,50 denarë për litër.
Çmimi i dizelit, ndërkaq, do të jetë 99 denarë për litër.
Vaji ekstra i lehtë për amvisëri shtrenjtohet për 4,5 denarë për litër dhe do të shitet me çmim prej 109,50 denarë.
Çmimi i mazutit rritet për 2,242 denarë për kilogram dhe do të jetë 48,243 denarë.
Me vendimin e KRRE-së, çmimet me pakicë të derivateve të naftës rriten mesatarisht për 2,86 përqind krahasuar me çmimet e përcaktuara me vendimin e mëparshëm të 7 shtatorit 2026.
Në përllogaritje është zbatuar edhe vendimi i Qeverisë për uljen e TVSH-së për eurodizelin në 10 përqind.
Ndërkohë, vazhdon zbatimi i akcizës së ulur për benzinat dhe naftën.
Qeveria në seancën e djeshme mori vendim për uljen e tatimit mbi vlerën e shtuar (TVSH) për karburantin dizel nga 18 në 10 përqind.
Kjo masë ndërmerret me qëllim amortizimin e goditjes së çmimeve ndaj qytetarëve dhe sektorit të biznesit gjatë periudhës së gjendjes së krizës, e cila vjen si pasojë e mundësisë për çrregullime në furnizimin me naftë dhe derivate të naftës. Sipas përllogaritjeve të Qeverisë, ulja e normës tatimore do ta zbusë ndjeshëm rritjen e paralajmëruar të çmimeve me pakicë.
Norma e reduktuar tatimore është e përkohshme dhe do të zbatohet nga mesnata e 15 shtatorit deri më 28 shtator.