Nga 1 korriku mund të kthehet tarifa e lirë e rrymës nga ora 14-16, paralajmëroi Bekteshi
Ministri i Ekonomisë Kreshnik Bekteshi dje njoftoi rikthimin e mundshëm të tarifës së lirë ditore të energjisë elektrike nga 1 korriku. Ai tha se për këtë çështje janë duke diskutuar me Komisionin Rregullator të Energjisë, duke u nisur nga fakti se shteti do të ketë tepricë të energjisë elektrike që do ta prodhojë nga maji deri në tetor të këtij viti, transmeton Portalb.mk.
“Së bashku me Komisionin Rregullator të Energjisë po punojmë që nga 1 korriku i këtij viti të rikthehet tarifa e lirë ditore e energjisë elektrike, duke pasur parasysh rritjen e prodhimit të energjisë elektrike nga burimet e rinovueshme”, tha Bekteshi.
Ndryshe, tarifa e lirë ditore për qytetarët u hoq më 1 janar 2022, kur pati një rritje më të madhe të çmimit të energjisë elektrike me 9.48 përqind. Para shfuqizimit të tij, qytetarët mund të përdornin energjinë elektrike të lirë çdo ditë nga ora 14 deri në 16. Aktualisht, energjia elektrike e lirë për qytetarët është në dispozicion vetëm gjatë natës – nga ora 22 deri në 7 të mëngjesit çdo ditë, si dhe gjatë gjithë ditës të dielave.
