U mbajt trajnimi treditor “Gazetari e bazuar në të dhëna dhe vizualizime”

Fondacioni Metamorfozis në bashkëpunim me Qendrën Ndërkombëtare për Gazetarë (International Center for Journalists – ICFJ) nga data 8 deri më 10 shkurt realizuan një trajnim treditor në gjuhën angleze “Gazetari e bazuar në të dhëna dhe vizualizime”. Në trajnimin e mbajtur në Shkup morën pjesë 13 të rinj, para së gjithash studentë dhe gazetarë të rinj nga rajoni i Shkupit dhe i Pollogut, transmeton Portalb.mk.

Trajnimin e realizuan tre gazetarë të udhëhequr nga gazetari i shquar i “New York Times”, Robert Gobeloff, i cili ligjëron gazetari të të dhënave në Fakultetin e Gazetarisë pranë Universitetit Kolumbia në Nju Jork. Si trajnues nga Fondacioni Metamorfozis ishin Goran Rizaov dhe Bojan Bllazhevski, redaktorë në Agjencinë e Lajmeve Meta.

Kjo ngjarje treditore u zhvillua si një kombinim i teorisë dhe punës praktike të pjesëmarrësve në trajnim, me ç’rast u mbuluan këto tema: definimi i termit “të dhëna” dhe llojet e të dhënave, si dhe ku mund të gjenden të dhënat, si të ekstraktohen nga dokumentet PDF, si të prezantohen të dhënat në tabela dhe si të bëhet analiza e të dhënave. Trajnuesit prezantuan edhe disa mjete softuerike për vizualizimin e të dhënave.

Pjesëmarrësit u ndanë në tre ekipe të cilat kishin për detyrë të krijojnë një vizualizim nga të dhënat e përzgjedhura për një temë specifike dhe në fund të trajnimit ta prezantojnë produktin final. Të rinjtë që morën pjesë në trajnimin treditor morën certifikata për aftësitë e fituara nga Qendra Ndërkombëtare e Gazetarëve dhe Fondacioni Metamorfozis.

Trajnimi i realizuar është pjesë e programit “Gazetaria për gjeneratën e re: Program për trajnim mediatik” të Fondacionit Metamorfozis në partneritet me Qendrën Ndërkombëtare për Gazetarë (ICFJ), ndërsa u realizua me mbështetjen financiare të Ambasadës së SHBA-së në Shkup.

Bëhet fjalë për trajnimin e parë nga gjithsej katër trajnime që do të zhvillohen në gjysmën e parë të vitit 2023. Përveç trajnimeve disa nga të rinjtë më të mirë që morën pjesë në punëtori do të kenë mundësi të bëhen praktikantë në një nga tre mediat e Fondacionit Metamorfozis. Në përzgjedhjen përfundimtare do të zgjidhen të rinjtë që do të realizojnë një vizitë studimore në SHBA të organizuar nga ICFJ.

Ky program ka për qëllim që të rinjve t’u mundësojë të fitojnë aftësitë e nevojshme për raportim me cilësi të lartë duke përdorur të dhëna dhe fakte të verifikuara, t’i njoftojë ata me aplikimin e mjeteve digjitale ekonomike ose me kod të hapur në punën e tyre dhe t’i lidhë ata me kolegë që kanë mendime të ngjashme për t’i shkëmbyer ato në lidhje me problemet e përbashkëta dhe zgjidhjet e mundshme.

Për të gjithë të rinjtë nën moshën 29 vjeç që janë nga rajoni Jugperëndimor dhe ai i Pellagonisë, tashmë është shpallur thirrja për regjistrim në trajnimin e dytë “Mis/Dezinformatat dhe Verifikimi i Fakteve”. Trajnimi i dytë do të mbahet në Strugë nga 22 deri më 24 mars. Afati i fundit për regjistrimin për të gjithë të rinjtë e interesuar është deri më 3 mars të vitit 2023.