Kuçuk: Në RMV ka forca politike që po e tërheqin vendin drejt “unioneve” të tjera, për anëtarësimin në BE nuk duhet të ketë pikëpamje të ndryshme

N. D. 10:22, 30-12-2022

Në Maqedoninë e Veriut, ka forca politike që qëndrojnë prapa agjendës së vendit për të qenë pjesë e Bashkimit Evropian, por ka të tjera që po e tërheqin vendin drejt unioneve të tjera ose të paktën po e devijojnë vendin nga rruga drejt BE-së, thotë lideri i liberalëve evropianë (ALDE) Eurodeputeti nga Rinovo Evropën/DPS dhe reporteri për vendin në PE, Ilhan Kuçuk, në një intervistë për agjencinë bullgare të lajmeve BGNES, transmeton Portalb.mk.

Kuçuk në intervistë thotë se Maqedonia e Veriut padyshim po ecën në një rrugë të vështirë të konsolidimit rreth temave të rëndësishme që kanë të bëjnë me të ardhmen e vendit. Anëtarësimi në NATO, thotë eurodeputeti, është një sukses i madh, si për BE-në, ashtu edhe për Bullgarinë dhe vendin, por siç shton ai, pyetja tjetër e madhe është se si vendi do ta realizojë plotësisht aspiratën e politikës së jashtme, ndërsa ajo kalon përmesë anëtarësimit në BE-së.

Ai paralajmëron se në RMV-ja ka forca që e tërheqin shtetin drejt projekteve të tjera gjeopolitike.

“Ka forca politike që janë qartazi prapa agjendës së vendit për të qenë pjesë e BE-së, por ka të tjera që po e tërheqin vendin drejt unioneve të tjera ose të paktën po e ridrejtojnë vendin në rrugën drejt BE-së. Dhe në vetë shoqërinë maqedonase këto biseda bëhen”, thotë reporteri për Maqedoninë e Veriut në Parlamentin Evropian.

Sipas tij, duhet të diskutohet për politikën sociale dhe ekonomike, por për çështjen e së ardhmes së shtetit, për anëtarësimin në BE nuk mund të ketë këndvështrime të ndryshme.

“Duhet të ketë konsensus kombëtar jo vetëm mes subjekteve politike individuale, por edhe mes njerëzve që krijojnë opinione”, tha eurodeputeti.

Në të njëjtën kohë, Kuçuk konsideron se duhet t’i kushtohet vëmendje edhe shembujve të mirë në marrëdhëniet midis Bullgarisë dhe Maqedonisë së Veriut, por shton se rruga drejt përmirësimit të marrëdhënieve duhet të ecet në këmbë.

“Ndodhën shumë gjëra të mira mes Bullgarisë dhe RMV-së në lidhje me arsimin, etj. Këtë herë duhet të shkohet në këmbë. Po, bisedimi është i ndërlikuar, është me shumë tension dhe shumë emocione, por e vetmja mënyrë është të flasim me njëri-tjetrin, sepse nëse bota prishet, prishet më së shumti për shkak të prishjes së dialogut. . Nëse e mohojmë dialogun si një mënyrë për të kapërcyer krizat dhe për të kapërcyer disponimin e shtresave emocionale, nuk ka rrugë përpara. Bullgaria dhe RMV-ja duhet të gjejnë rrugë të reja që do të ndjekin të dy popujt,” thotë eurodeputeti dhe raportuesi për përparimin e vendit në PE, Ilhan Kuçuk.

Ndryshe, pas 17 vitesh Maqedonia e Veriut më 19 korrik të këtij viti filloi negociatat me BE-në me mbajtjen e konferencës ndërqeveritare.

Propozimi francez për zgjidhjen e ngërçit Bullgari-Maqedoni e Veriut dhe hapjen e negociatave eurointegruese, në vend mbërriti më 30 qershor.

Menjëherë pas miratimit të propozimit francez në Parlamentin e Maqedonisë së Veriut, më 19 korrik u zhvillua konferenca e parë ndërqeveritare midis Maqedonisë së Veriut dhe Shqipërisë me Bashkimin Evropian. Negociatat nuk do të fillojnë derisa të bëhen ndryshimet kushtetuese nga pala e Maqedonisë, të cilat për votim në Kuvend kërkojnë dy të tretat e deputetëve, të cilat shumica nuk i ka, prandaj duhet mbështetje nga opozita maqedonase, e cila ka paralajmëruar se nuk do të votojmë për ndryshimin e Kushtetutës, madje duke e kundërshtuar atë me protesta.

Kujtojmë se para heqjes së vetos, hapja e negociatave me Bashkimin Evropian për Maqedoninë e Veriut bllokohej vazhdimisht nga Bullgaria. Sofja zyrtare kërkonte që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Josip Broz Tito. Ky kontest bllokoi për dy vite procesin eurointegrues të vendit, me çka Bullgaria gjatë vitit 2021 i vendosi dy herë veto Maqedonisë së Veriut, njëherë në qershor, kurse më pas, më 14 dhjetor të vitit 2021, edhe një herë e bllokoi fillimin e negociatave RMV-BE.