Zelensky: Mbi gjashtë milionë ukrainas pa energji elektrike
Presidenti ukrainas Volodymyr Zelensky tha sonte se më shumë se gjashtë milionë familje në vend ishin ende të prekura nga ndërprerjet e energjisë, dy ditë pasi forcat ruse goditën si shënjestër infrastrukturën kryesore të energjisë në Ukrainë, transmeton REL.
“Nga sonte, nuk ka energji elektrike në shumicën e rajoneve (në Ukrainë) dhe në Kiev. Gjithsej më shumë se gjashtë milionë abonentë”, tha Zelensky në adresimin e tij.
Zelensky deklaroi se rreth 600.000 abonentë kanë mbetur pa energji elektrike në kryeqytetin e Kievit, ndërsa ndër zonat më të prekura janë gjithashtu rajonet Odesa, Lviv, Vinnytsia dhe Dnipropetrovsk.
Njëkohësisht, guvernatori i rajonit Herson në Ukrainën juglindore, tha se “për shkak të granatimeve të vazhdueshme” zyrtarët evakuuan pacientët nga disa spitale, ndërsa një zyrtar tjetër ukrainas fajësoi forcat ruse për dhjetëra viktima nga granatimet, raporton AFP.
Galina Lugova, shefe e administratës ushtarake të qytetit Kherson, tha se 15 banorë të qytetit Herson u vranë nga bombardimet ruse gjatë ditës dhe 35 të tjerë u plagosën, duke përfshirë një fëmijë.
