Dekani i Fakultetit të Sigurisë Dujovski: Raportimet për bomba në shkolla janë shembull klasik se si bëhet kërcënimi hibrid

N. D. 11:30, 10-11-2022

Gjimnazi "Josip Broz Tito" në Shkup, foto: Meta.mk, shkolle, bomba, kercenim — Foto arkiv, gjimnazi "Josip Broz Tito" nën kërcënim të "bombace", Shkup, foto: Meta.mk

Raportimet e rrejshme për bomba të vendosura nëpër shkolla janë pikërisht si “në libër” se si bëhet një kërcënim hibrid, sipas dekanit të Fakultetit të Sigurisë, Nikolla Dujovski, i cili thotë se jo rastësisht janë zgjedhur shkollat si objektiv i raportimeve për bomba, transmeton Portalb.mk.

Duke folur në programin e mëngjesit të radiotelevizionit të Maqedonisë, Dujovski theksoi se është më se e qartë se qëllimi i personave që dërgojnë mesazhe kërcënuese është të shkaktojnë frikë dhe panik në popullatë.

“Mesiguri nuk është e mundur të bëjmë më shumë dëm sesa mesazhi i shkruar, por sigurisht që duhet të jemi të kujdesshëm, sepse thjesht bota, dhe ky rajon në veçanti, është shumë i ndjeshëm ndaj kërcënimeve të tilla hibride dhe çdo gjëje tjetër që mund të shkaktojë ankth. Shkollat nuk janë zgjedhur rastësisht, sidomos shkollat e mesme. Për shkak se atje fëmijët udhëtojnë të pavarur, prindërit zakonisht nuk e dinë se si është procesi derisa fëmijët janë aty dhe pikërisht kështu bëhet një kërcënim hibrid sipas librit”, thotë Dujovski.

Trendi i kërcënimeve me bombë, i cili fillimisht filloi në Serbi para disa muajsh, thotë Dujovski, tani është edhe në vendin tonë si pjesë e kërcënimeve që për momentin mbeten vetëm në fazën e mesazheve të dërguara gabimisht, por, siç tha ai policia ka përgjegjësi dhe është mirë që vepron kështu.

“Fëmijët, mësuesit dhe të gjithë të pranishmit në shkolla duhet të evakuohen menjëherë dhe të dërgohen në një vend të sigurt dhe policia të hetojë çdo raportim për bombë apo ndonjë kërcënim. Kjo është duke u bërë dhe do të bëhet në periudhën e ardhshme. MPB po i ndërton kapacitetet që të mund t’u përgjigjemi kërcënimeve të tilla, t’i përgjoj mesazhet e tilla, t’i analizojë dhe thjesht t’i parandalojë”, tha profesor Dujovski.

Sipas tij, është mirë që shkëmbejmë informacione në rrjetin e NATO-s sepse këto çështje nuk janë vetëm për Maqedoninë dhe nuk jemi i vetmi vend i ekspozuar ndaj presioneve të tilla dhe është mirë që të vazhdojmë t’i ndërtojmë kapacitetet tona.

“Shpresoj që kjo tendencë të qetësohet dhe shpresoj që institucionet t’i përkushtohen nivelit të detyrës, në fakt si deri tani”, tha dekani i Fakultetit të Sigurisë.

Dje, kryeministri Dimitar Kovaçevski theksoi se raportimet e rreme për bomba që dje për të gjashtën herë kanë arritur në shkollat e Shkupit janë pjesë e strategjisë për sulme hibride, ndaj të cilave janë të ekspozuara edhe vendet e rajonit dhe më gjerë.

Ministri i Punëve të Brendshme, Oliver Spasovski dje tha se shumica e kërcënimeve për vendosjen e bombave nëpër shkollat e mesme janë lokalizuar nga vijnë dhe se Ministria po punon në mbrojtje.

Nëntë shkolla të Shkupit dje kanë marrë kërcënime për vendosje të bombave në objektet e tyre, por pas kontrolleve antiterroriste të kryera nga njësitet e MPB-së, janë konstatuar të rreme.