Euractiv: Ndihma financiare nga BE-ja e mirëseardhur për Ballkanin Perëndimor, përfshirë Maqedoninë e Veriut
Bashkimi Evropian ka premtuar 500 milionë euro për përmirësimin e infrastrukturës energjetike në Ballkanin Perëndimor, tha dje kryetarja e Komisionit Evropian Ursula von der Leyen në Maqedoninë e Veriut në vizitën e parë të turneut nëpër rajon, shkruan Euractiv.
Njoftimi vjen pasi rritja e çmimeve të energjisë të shkaktuara nga lufta e Rusisë në Ukrainë dhe fillimi i dimrit shkaktuan valë tronditëse në ekonomitë evropiane që tashmë po luftojnë me rritjen e inflacionit.
Sipas Von der Leyen, ndihma fillon me 80 milionë euro në mbështetje të menjëhershme buxhetore për Maqedoninë e Veriut për të “ndihmuar në përballimin e ndikimit të çmimeve të larta të energjisë”.
“Por sigurisht që do të vijnë më shumë. Për shembull, ka 500 milionë euro grante për të gjithë rajonin për të investuar në lidhjet energjetike, efiçencën e energjisë dhe sigurisht energjinë e rinovueshme”, tha Von der Leyen, duke theksuar rëndësinë e të qenit i pavarur nga karburantet fosile ruse.
Një pjesë e mbështetjes është përmes blerjes së përbashkët të gazit në tregun botëror.
“Kriza energjetike dhe ekonomike e shkaktuar nga lufta në Ukrainë bashkoi Evropën. Vetëm të bashkuar mund ta përballojmë mungesën e energjisë dhe ushqimit”, tha kryeministri i Maqedonisë së Veriut, Dimitar Kovaçevski.
Lajmi është një lehtësim i mirëpritur për shumë vende të Ballkanit Perëndimor, përfshirë Maqedoninë e Veriut, e cila ka marrë 80 milionë euro, dhe prodhimi i brendshëm i energjisë elektrike i së cilës plotëson vetëm dy të tretat e nevojave vjetore të vendit.
Shumica e vendeve të Ballkanit Perëndimor, përfshirë Maqedoninë e Veriut, janë në faza të ndryshme të negociatave për hyrjen e mundshme në BE, me disa vende që janë kandidatë zyrtarë për anëtarësim për më shumë se një dekadë.
Përfaqësues zyrtarë të BE-së vazhdimisht deklarojnë se vendet e Ballkanit Perëndimor janë pjesë e familjes evropiane, pavarësisht procesit të gjatë të anëtarësimit.
Ekspertët kanë paralajmëruar se procesi i bllokuar i integrimit ka shkaktuar rritje të euroskepticizmit, duke lënë hapësirë për rritjen e ndikimit rus në rajon.
