Nuk është e vërtetë se Tetova është pajisur me autobus elektrik siç transmetuan mediat
I pavërtetë është lajmi se Ndërmarrja Publike “Tetova Transport” është pajisur me autobus elektrik, i cili do të do promovohet nesër. Ndërmarrja në fjalë ka lëshuar një komunikatë ku thotë se do të promovohet një autobus elektrik dhe jo se ka blerë të njëjtin siç e kanë transmetuar mediat, shkruan Portalb.mk.
Ndërmarrja në njoftimin e saj nuk tregoi se nuk bëhet fjalë për pajisje me autobus të ri
Ndërmarrja Publike “Tetova Transport” dje përmes një komunikate në Facebook njoftoi se nesër (e premte- 30 shtator) do të prezantohet autobusi elektrik.
Në këtë komunikatë në asnjë moment nuk thuhet se ndërmarrja është pajisur me autobus elektrik, por që mënyra se si është shkruar nuk është konkretizuar mirë dhe lë hapësirë për keqkuptim.
Deklarata e plotë e ndërmarrjes “Tetova Transport”:
Mediat njoftuan se autobusi është blerë
Duke mos verifikuar nëse ndërmarrja është pajisur me një autobus të tillë, dhe çfarë konkretisht planifikohej me këtë aktivitet, disa media kanë shpërndarë lajm se Tetova është pajisur me autobus elektrik, kështu duke krijuar opinion publik të rremë.
Kështu raportuan disa media kinse Tetova është pajisur me autobusin elektrik:
- TV21: “Ndërmarrja Publike “Tetova Trsansport”- Tetovë njofton se janë pajisur me autobus elektrik.
- Klan Macedonia: Tetova bëhet me autobus elektrik
- Telegrafi: Tetova bëhet me autobus elektrik, të premten do të lëshohet në përdorim
- Zhurnal.mk: Tetova bëhet me autobus elektrik
- Gazeta Express: Ndërmarrja Publike “Tetova Transport” informon se të premten do ta prezantojnë modelin e autobusit elektrik, i cili do të përdoret për transportin publik në qytet. Nga kjo ndërmarrje thonë se ky autobus do të lëshohet në përdorim të premte dhe vozitja do të jetë falas për të gjithë qytetarët.
- Lajmpress: Ndërmarrja Publike “Tetova Transport” – Tetovë njofton se janë pajisur me autobus elektrik.
- Telegrami.mk: Tetova bëhet me autobus elektrik
- Flaka.com: Tetova bëhet me autobus elektrik
- Gazeta Populli: Tetova bëhet me autobus elektrik
- Tetova Sot: Tetova bëhet me autobus elektrik
Titujt e përdorur janë çorientues dhe brenda në lajm nuk sqarohet situata reale, në disa prej tyre qëndron vetëm komunikata nga ana e ndërmarrjes ndërsa disa të tjera e interpretojnë atë se ndërmarrja është pajisur me autobus elektrik.
Autobusi vetëm për reklamë
Drejtori i Ndërmarrjes Publike “Tetova Transport” i pyetur nga Portalb.mk se a është blerë ky autobus apo është donacion, tha se autobusi elektrik është promovim i kompanisë ISUZU, ndërsa ata si ndërmarrje janë duke bërë një projekt që në të ardhmen të furnizohen me autobusë elektrik.
Edhe zyrtarisht nga kjo ndërmarrje për Portalb.mk njoftojnë se nuk bëhet fjalë për autobus të ri por vetëm promovim.
“Pasi ndërmarrja jonë NP “Tetova Transport”- Tetovë ka në përdorim autobusët e markës ISUZU po të njëjtët propozuan promovimin e prodhimit të tyre më të fundit si inovacion të tyre më të ri. Qëllimi i vetëm i saj është promovimi po ashtu edhe në qytetin tone të Tetovës të prezantohet modeli më i ri i autobusit elektrik ISUZU NOVOciti, e cila po ashtu do të bëhet edhe në të gjitha qytetet e tjera të RMV-së të cilat kanë transport publik”, thanë nga kjo ndërmarrje.
Ndërsa sa i përket asaj se a do të blejë ndërmarrja ndonjë lloj të tillë thonë se nuk ka buxhetin e mjaftueshëm për një të tillë.
Duke iu përgjigjur një këshilltari në lidhje me autobusin elektrik në seancën e djeshme të këshillit komunal të Tetovës, këshilltari komunal nga Lëvizja Besa, Arbër Ajdini i cili është edhe pjesë e ndërmarrjes “Tetova Transport” tha se është keqkuptuar se ndërmarrja ka siguruar autobus elektrik.
“Bëhet fjalë për një promovim nga ana e kompanisë ISUZU, autobusi i parë do të vijë në Tetovë, ato do të bëjnë promovime në të gjithë qytetet, një ndër qytetet e kanë zgjedhur edhe qytetin tonë, domethënë është promovim”, tha Ajdini.
Qytetarët e Tetovës do të mundin të shfrytëzojnë falas një vozitje me autobusin elektrik që do të qarkullojë nëpër Tetovë nesër (e premte, 30 shtator).
Ndërmarrja e transportit publik në Tetovë ka pesë autobusë të cilët janë janë blerë me kredi prej 1.2 milion eurove nga Banka Botërore, të cilën e ka marrë Komuna e Tetovës, e cila do të paguhet për 13 vite, me normë interesi prej 3%.
