Kompanitë energjetike paralajmëruan për krizën “e paprecedentë” të likuiditetit në Evropë

Sektori i energjetikës po përballet me një “stuhi”, me çmimet e larta të gazit që godasin margjinat e kompanive evropiane të energjetikës në një kohë kur nevojiten më shumë se 100 miliardë euro investime çdo vit për të nxitur tranzicionin e gjelbër, transmeton Euractiv.

Çmimet e larta të gazit jo vetëm që po dëmtojnë fuqinë blerëse të amvisërive, por gjithashtu po i vënë kompanitë energjetike nën një “tension të paparë likuiditeti”, i cili po shkakton “të ashtuquajturat thirrje ekstreme të marzhit”, tha Kristian Ruby, sekretari i përgjithshëm i Eurelectric, shoqata e industrisë elektrike e BE-së.

“Nëse keni një rritje prej 10 faktorë në çmim, atëherë papritur keni një grup të madh kërkesash për likuiditet për të mbuluar kolateralin tuaj. Dhe nuk është diçka nga e cila mund t’i shpëtosh”, tha ai për EURACTIV.

Ndërmarrjet shesin pjesën më të madhe të energjisë së tyre vite më parë për të garantuar një çmim të caktuar, në një marrëveshje që u kërkon të depozitojnë një “marzh minimal” në një llogari si një rrjet sigurie në rast se ata dështojnë përpara se energjia të prodhohet dhe të hyjë në treg.

Një thirrje marzhi ndodh nëse fondet në llogari bien nën kërkesën minimale të marzhit për një tregti, duke e detyruar kompaninë ta sigurojë atë me më shumë para.

Çmimet e energjisë elektrike në tregun me shumicë u rritën me 532% midis janarit 2021 dhe gushtit 2022 për shkak të rënies së furnizimeve me gaz, sipas Barometrit të Fuqisë së Eurelectric, të zbuluar të mërkurën (7 shtator).