Kosovë, paraburgim edhe për dy të dyshuarit tjerë për dhunimin e 11-vjeçares
Gjykata Themelore në Prishtinë njoftoi të martën se dy të dyshuarve për dhunimin e 11-vjeçares u është caktuar masa me nga një muaj paraburgim, transmeton Radio Evropa e Lirë.
Gjatë të hënës, masë me kohëzgjatje të njëjtë paraburgimi u ishte caktuar edhe dy të dyshuarve të tjerë.
Aktualisht në paraburgim janë katër nga pesë të dyshuarit për dhunimin e të miturës. Ndërsa personi i pestë, sipas PK-së është identifikuar, por ende nuk ka informacione nëse i njëjti është arrestuar.
Një 11-vjeçare dyshohet së është dhunuar nga pesë persona, më 27 gusht, në Prishtinë, njoftoi të hënën Policia e Kosovës. Sipas PK-së viktima është dërguar në një strehimore.
Rasti dyshohet se ka ndodhur në një park të qytetit.
Të dyshuarit për dhunimin e 11-vjeçares janë tre të mitur me inicialet G.R, G.J dhe XH.S. Si dhe, personi i katërt i moshës madhore, me inicialet E.R.
Rasti nxiti reagime të shumta, si nga udhëheqësit e institucioneve, ashtu edhe nga përdorues të tjerë të rrjeteve sociale.
Qytetarë dhe organizata të ndryshme joqeveritare paralajmëruan protesta në Prishtinë, për të martën dhe të mërkurën.
Ndryshe, një grua është sulmuar seksualisht gjatë ditës së djeshme nga dy burra të dyshuar, të panjohur, në Prishtinë.
