Familja e Martinit të zhdukur kërkon donacione për të përshpejtuar kërkimet
Janë hapur dy llogari donacionesh për të mbledhur fonde për kërkimin e 31-vjeçarit Martin, i cili u zhduk të shtunën në ujërat e detit Egje, pranë Posidit, Halkidiki, transmeton Portalb.mk.
Ivani, i cili u gjet pas 19 orësh në ujë, në rrjetin social Facebook ka bërë thirrje që njerëzit të ndihmojnë për të gjetur Martinin.
“Unë, Ivan, i dyti i gjetur nga tre të zhdukurit në Greqi, në emër të familjes së Martinit që janë në kërkim aktiv, kam hapur një llogari të dedikuar donatorësh për të mbledhur fonde. Nëse keni mundësi, do të kërkoja donacionin tuaj që ta përfundojmë këtë kërkim sa më shpejt dhe t’ia lehtësojmë barrën familjes së tij”, shkroi Ivani në Facebook.
Ekipet greke të shpëtimit, së bashku me vullnetarë, janë ende në kërkim të 31-vjeçarit Martin, i cili u zhduk pesë ditë më parë në ujërat e detit Egje, pranë qytetit të vogël Posidi në Halkidiki. Edhe pse afati ligjor prej 72 orësh për kërkim ka përfunduar, pas ankesave të familjes dhe në marrëveshje me MPJ-në e Maqedonisë dhe Greqisë, kërkimet vazhdojnë.
Mediat greke raportojnë se janë përfshirë dy dronë ajror të ekipit të shpëtimit OFKAT, një qen shpëtimi me trajner. Në të njëjtën kohë, kërkimet do të vazhdojnë përgjatë bregdetit, në rast se Martini do të arrinte të notonte deri në tokë.
Droni do të kërkojë zonën drejt Agia Paraskevi pasi është i paarritshëm dhe nuk mund të arrihet nga droni nënujor.
Ai është ende i zhdukur pasi rrymat detare e futën në det atë dhe dy miqtë e tij, tashmë të shpëtuar, në plazhin e famshëm Miti në Poseidi, Halkidiki.
Më 9 korrik, 30-vjeçari Ivan, së bashku me dy miqtë e tij, Vasil (25) dhe Martin, festoi ditëlindjen në plazhin Mitis, në Halkidikit, Kasandra. Vasili dhe Martini vendosën të hynin në det për të notuar, por në momentin që vunë re se rrymat detare ishin jashtëzakonisht të forta, tashmë ishte tepër vonë për t’u kthyer. Ivan e kuptoi se diçka nuk shkonte. Duke parë se shokët e tij ishin në rrezik, 30-vjeçari vendosi të futet në ujë për t’i ndihmuar. Por rrymat e forta detare – të cilat pengojnë edhe vendasit të notojnë atje – e morën edhe atë.
Ministria e Punëve të Jashtme e Maqedonisë së Veriut njoftoi se gjatë mbrëmjes nëna e shtetasit të zhdukur M.J. u prit nga Konsulli i Përgjithshëm në Selanik, i cili vazhdon të komunikojë ngushtë me autoritetet kompetente greke dhe është në dispozicion për çdo ndihmë të nevojshme.
Mediat greke publikojnë listë me plazhet më të rrezikshme të Greqisë, ku përfshihet edhe Mitis pranë Poseidonit, pasi këtu gjiri i Selanikut takohet me detin Egje dhe për shkak të baticave, lëvizja e rrymave detare ndryshon. Kur fryn erë jugore, kthehet në drejtim të vendit të Poseidonit dhe kur fryn erë veriore, atëherë rrymat ndryshojnë drejt gjirit të Selanikut.
Në kushte të caktuara klimatike, një numër i madh plazhesh në Greqi janë të mbyllura për vizitorët, dhe ndër to janë plazhet e Lalaria (Skiathos), Matala (Kretë), Nas (Ikaria), Chorefto (Pelion), Platia Amos (Kefalonia), Kalami (Kythira).
