Shqipëria ratifikoi protokollet për anëtarësimin e Suedisë dhe Finlandës në NATO

Presidenti i Shqipërisë Ilir Meta dekretoi dy ligje të dielën përmes të cilave ratifkoi vendimet e Kuvendit të Shqipërisë që aprovoi anëtarësimin e Finlandës dhe Suedisë në NATO, transmeton Radio Evropa e Lirë.

“Anëtarësimi i këtyre vendeve mike patjetër që është një zhvillim historik dhe ndryshim i madh strategjik, që mbështetet në çdo hap nga Shqipëria. Jemi të bindur se anëtarësia e tyre do të ndikojë në forcimin e kontributit të përbashkët në këtë aleancë”, tha Meta në deklaratë për media.

Shqipëria është ndër vendet e para anëtare të NATO-së që miratuan plotësisht anëtarësimin e dy shteteve evropiane në aleancën veriatlantike të mbrojtjes.

Finlanda dhe Suedia, vende që me dekada mbajtën status neutraliteti ushtarak, aplikuan zyrtarisht për anëtarësim në NATO pasi që invazionit rus i Ukrainës shtoi shqetësimet e sigurisë në këto dy shtete evropiane.

Në përputhje me procedurat e anëtarësimit të anëtarëve të ri në NATO, 114 deputetë të Kuvendit të Shqipërisë votuan të enjten me vendim unanim që të aprovojë hyrjen e Finlandës dhe Suedisë në NATO.

Kanadaja ishte vendi i parë që kompletoi një procedurë të tillë, ndërkohë që tashmë një ratifikim të tillë e ka bërë të premten dhe parlamenti gjerman.

Protokollet i pranimit të Finlandës dhe Suedisë në NATO duhet të aprovohet nga parlamentet e 30 vendeve anëtare të aleancës para aderimit formal të dyja shteteve dhe kjo procedurë formale pritet të zgjasë rreth një vit.

Deri më tani, vetëm Turqia e ka kundërshtuar anëtarësimin e Finlandës dhe Suedisë, por këto kundërshtime janë bërë temë diskutimi bilateral duke i hapur rrugë një sërë kompromisesh mes Turqisë dhe dy shteteve që duan t’i bashkohen NATO-s.

Lajme të ngjashme

Leave a Reply

Your email address will not be published. Required fields are marked *

Back to top button