Skandal në Radiologji: Rreth 1.200 pacientë, mes të cilëve edhe të sëmurë me kancer gjysmë viti presin rezultatet

Rreth 1.200 pacientë, mes të cilëve edhe të sëmurë me kancer, kanë më shumë se gjashtë muaj që presin të lexohen rezultatet e tomografisë kompjuterike dhe rezonancës magnetike në Klinikën e Radiologjisë në Shkup, mëson jozyrtarisht Fokus nga burime spitalore, transmeton Portalb.mk.

Sipas informacioneve tona, që nga janari e deri më tani nuk janë lexuar rezonancat magnetike në kokë, qafë, shtyllë kurrizore dhe një tufë tomografish kompjuterike. Burimet e Fokus-it pohojnë se në klinikë ka më shumë se 20 mjekë të cilët realisht në nivel ditor, një doktor mund të lexojë 20 rezultate, për tre ditë mund të lexohen të gjitha rezultatet.

Siç mësohet, shumë prej pacientëve, jeta e të cilëve varet nga këto rezultate, presin me muaj të tërë, ndër ta ka edhe pacientë me kancer, te të cilët duhet menjëherë të reagohet, që të dihet për të ditur se çfarë më tej me terapinë. Ajo që është edhe më e rëndë në gjithë rrëfimin është se disa nga pacientë kanë vdekur në pritje të rezultateve.

“Fokus” ka biseduar me një nënë të një fëmije 17-vjeçar, e cila vitin e kaluar në Radiologjinë e Shkupit ka bërë rezonancë magnetike në zemrën e vajzës së saj, por rezultati ende nuk është lexuar.

“Ajo që po ndodh atje është e tmerrshme. A e di dikush që pacientët vdesin duke pritur rezultatet. Ne kemi pritur më shumë se gjashtë muaj për t’i lexuar ato. Nuk e kuptoj kaq shumë mjekë se çfarë po ndodh”, ka sqaruar e indinjuar nëna në një prononcim për “Fokus”.

Prej kohësh pacientë të shumtë reagojnë pranë institucioneve përmes ankesave, duke kërkuar mënyrën për të shpëtuar jetën e njerëzve të tyre të dashur, pasi atje shkojnë pacientë që kanë probleme reale shëndetësore.

“Nëna ime vdiq duke pritur rezultatet. Kush do të përgjigjet për këtë. Ajo që po ndodh atje është e tmerrshme. Le të bëhet diçka, ndërsa unë ligjërisht do të marr diçka kundër klinikës”, thotë një grua 33-vjeçare nga Shkupi.

Gjithashtu, disa pacientë me të cilët ka biseduar Fokus pohojnë se disa mjekë u kanë kërkuar 50 euro, nëse duan t’u lexojnë ndonjë rezultat.

“Fokus” iu drejtua edhe drejtoreshës aktuale të Klinikës së Radiologjisë, Gordana Belçeska, nga e cila kërkuan të sqarojë arsyen pse pacientët kanë më shumë se gjashtë muaj që presin që t’u lexohen rezultatet dhe pse po ndodh kjo.

Mirëpo, drejtoresha, pavarësisht se i lexoi pyetjet, nuk dha asnjë reagim.

Kontaktuan edhe Inspektoratin Shtetëror Sanitar Shëndetësor, ku pyetëm nëse kishin marrë ankesë nga disa pacientë. Prej aty morëm përgjigje pozitive.

“Më datë 24.06.2022, IShSSh ka marrë ankesë për mosdhënien e rezultatit për një incizim të bërë në këtë institucion. Duke vepruar në bazë të Ligjit për mbrojtje shëndetësore dhe Ligjit për të drejtat e pacientëve, Fondi Shtetëror i Sigurimeve Shëndetësore, menjëherë (e hënë 27.06), ka kryer inspektim të jashtëzakonshëm dhe ka konstatuar se ka rezultate të dorëzuara të procedurave tashmë të kryera diagnostike”, thuhet në një deklaratë për “Fokus”, Irina Buhova, drejtoreshë e IShSSh.

Ajo shton se IShSSh, pas inspektimit, i cili ka konstatuar mangësi në përputhje me kompetencat e Inspektoratit, ka nxjerrë vendim me të cilin institucioni ISHP për Radiologji obligohet të respektojë afatin e vlefshmërisë së udhëzimeve të lëshuara.

Klinikës i është dhënë afat shtatë ditë për të vepruar dhe për të lexuar të gjitha rezultatet e pacientëve.