Nëntë muaj pas tragjedisë në spitalin modular të Tetovës, Prokuroria ende nuk ka vendim për përgjegjësi penale (VIDEO)

Ende nuk ka vendim nga ana e Prokurorisë se kush dhe si do të thirret në përgjegjësi penale për zjarrin në spitalin modular në Tetovë ku humbën jetën 14 persona. Prokuroria thekson se përgatitja e vendimit është në proces e sipër, shkruan Portalb.mk.

Prokuroria, edhe pse e pyetur për detaje konkrete se cilët do të thirren në përgjegjësi për tragjedinë e ndodhur në  spitalin modular ku trajtoheshin pacientët me Covid-19 në Tetovë, nuk japin detaje konkrete.

“Përgatitja e vendimit të prokurorit publik për rastin është në proces e sipër. Bëhet fjalë për një çështje komplekse, në të cilën duhet shpjeguar me kujdes dhe saktësi të gjitha aspektet e përgjegjësisë penale të përcaktuar dhe të renditen të gjitha provat që e mbështesin atë. Sapo të merret vendimi, publiku do të njoftohet menjëherë”, informojnë nga Prokuroria.

Paraprakisht, mediat duke cituar burime nga Prokuroria njoftuan që pritet të ketë përgjegjësi penale për disa persona

Ndërsa kryeprokurori publik, Lubomir Joveski ka njoftuar se Prokuroria do të japë përgjigje për dilemat e paraqitura konkrete për përgjegjësitë eventuale të personave të caktuar.

Para tre javësh dështoi debati për djegien e spitalit modular në Tetovë në Komisionin e përhershëm anketues për mbrojtjen e lirive dhe të drejtave të njeriut , pasi deputetët e pushtetit munguan dhe nuk kishte kuorum për debat.

Deri më tani janë kryer katër ekspertiza. E para është realizuar nga Ministria e Punëve të Brendshme, e cila ka konstatuar se kontakt i shkurtë i energjisë elektrike gjatë reanimimit të një pacienti e ka djegur një kabllo shtesë, pas çka ka shpërthyer zjarri. E dyta është e Fakultetit të Teknologjisë, për të cilën nuk ka detaje për gjetjet, e treta është bërë nga një elektro-inxhinier për instalimet në spital, ndërsa e katërta nga ekspertiza gjermane, ku prokuroria ka thënë se e nuk ndryshon shumë nga konstatimet e ekspertëve të Sektorit për Kontrolle Ekspertiza Kriminalistikë (SKEK).

Deri sot nuk kemi një përgjigje konkrete se a ka pasur ose jo spitali sistem kundër zjarrit. Dëshmitarët që i kanë shpëtuar tmerrit kanë deklaruar se nuk ka pasur, por autoritetet përkatëse ende nuk konfirmojnë diçka të tillë. Nëse ka pasur, ku kanë qenë që pacientët nuk kanë mundur t’i gjejnë, kur janë kontrolluar së fundmi herë që funksionojnë ose jo?

Nuk e dimë ende se materiali me të cilin është ndërtuar a ka qenë rezistent ndaj zjarrit, edhe pse autoritetet thonë se spitali i ka përmbushur të gjitha standardet. Spitali është djegur vetëm për disa minuta dhe me plotë të drejtë qytetarët kërkojnë përgjigje ndaj pyetjes, nëse i ka përmbushur të gjitha standardet pse është djegur kaq shpejtë?

Nuk dihet se kush e ka bërë raportin për specifikat teknike të objektit. Prokuroria vetëm mbledh dokumentacione, por nuk i ndan me opinionin që qytetarët ta shohin dokumentacionin e ndërtimit të objektit.

Çështja tjetër, e cila gjithashtu është skandaloze, e për të cilën deri më tani askush nuk ka dhënë përgjegjësi është se në mesin e viktimave ka pasur edhe dy familjarë të pacientëve që janë kujdesur për familjarët e tyre. Kjo nënkupton që brenda spitalit ku trajtoheshin pacientët me Covid-19 ka pasur edhe familjarë të cilët aty kanë qëndruar me dijeni të personelit dhe administratës së spitalit, e cila është reptësisht e ndaluar.

Zjarri i tmerrshëm që e bëri hi spitalin modular në Tetovë, mori me vete 14 jetë të pacientëve të trajtuar nga Covid-19, por edhe të anëtarëve të familjeve që ndodheshin brenda. 14 persona u shpëtuan përpara se objekti të digjej plotësisht.

• LEXO: Dështoi debati për djegien e spitalit modular në Tetovë dhe djegien e autobusit të “Besa Trans”, munguan deputetët e pushtetit
• LEXO: U paralajmërua padi ndaj 4 personave për djegien e spitalit modular në Tetovë
• LEXO: Prokuroria ende i analizon provat e Spitalit Modular të Tetovës, Joveski pret që së shpejti rasti të ketë epilog
• LEXO; 14 persona vdiqën në tragjedi, politikanët “grinden” dhe e akuzojnë njëri tjetrin për përfitime politike
• LEXO: Po hetohet pse kontrolli teknik ku “kaloi” autobusi fatal i “Besa Trans” nuk u mbyll
• LEXO: Tragjedi në Bullgari, 45 udhëtarë të vdekur në aksidentin e autobusit me targa të Maqedonisë
• LEXO: 5 muaj pas aksidentit të autobusit në Bullgari, askush nuk ka dhënë përgjegjësi penale në RMV