Pendarovski: Zgjedhje të parakohshme mund të bëjmë nesër, por dyshoj se ato do të zgjidhin krizat me të cilat përballemi

Zgjedhje të parakohshme mund të mbajmë nesër, por çfarë do të zgjidhnin në lidhje me krizat me të cilat po përballemi, vlerësoi presidenti Stevo Pendarovski, duke shtuar se dyshon se zgjedhjet e parakohshme do të zhbllokojnë integrimin evropian ose do të ndryshojnë çmimet e energjisë dhe ushqimeve, transmeton Portalb.mk.

Duke folur për paqëndrueshmërinë politike dhe turbulencat në vend, Pendarovski në emisionin “Brifingu i mëngjesit” tha se nuk sheh se si mund të zgjidhen krizat me një strukturë të re politike.

“Çmimet e larta të energjisë, ushqimeve dhe inflacionit nuk janë vetëm produkt vendas. Kriza energjetike filloi gjashtë deri në shtatë muaj para luftës në Ukrainë. Si do të ketë ndikim qeveria e re në tregjet botërore të produkteve ushqimore”, tha Pendarovski.

Sipas Pendarovskit, fakt është se “ndërtimi i skenës politike bullgare” aktualisht është i tillë që është e vështirë të arrihet marrëveshje.

“Perspektiva për BE-në në të ardhmen e parashikueshme fatkeqësisht ka përfunduar. Shanset po bëhen gjithnjë e më të vogla. Nuk mund të them se kanë mbaruar. Nuk mund të them, qytetarë, nga nesër do të shkojmë në një perspektivë krejtësisht tjetër strategjike, sepse nuk shoh një tjetër më të mirë, por duhet t’i menaxhojmë ato pritje që ishin jorealisht të larta para një ose dy viti”, tha presidenti Stevo Pendarovski në”Utrinski brifing”.

Për “Ballkanin e Hapur”, Pendarovski tha se ka rezerva për këtë iniciativë nga viti 2019 dhe se nuk duhet të jetë alternativë për BE-në, duke theksuar se politikanët nuk do të kenë besueshmëri pas 20 vitesh BE dhe NATO, të dalin dhe të thonë para qytetarëve se ka një nismë tjetër evropiane.

“Tani për tani unë nuk kam problem me atë iniciativë, sepse nuk e shoh të deklarohet dhe në thelb është një alternativë e integrimit evropian… “Ballkani i hapur” dhe ky është qëndrimi i BE-së, duhet të jetë vetëm pjesë e Procesit të Berlinit për rajonin. Për momentin, qëndrimi i KE-së është që të gjashtë vendet e Ballkanit Perëndimor të jenë pjesë dhe të gjashtë janë pjesë e procesit të Berlinit, ndërsa në Ballkanin e Hapur janë vetëm tri”, tha Pendarovski.

Lidhur me luftën në Ukrainë, Pendarovski tha se sipas të gjitha vlerësimeve nuk ka negociata në prapavijë, ndërsa më së paku negociata serioze politike ndërmjet Rusisë dhe Ukrainës.

“Praktikisht të dyja anët e Atlantikut, sot po të pyesësh, thonë se lufta do të zgjasë. Dallimi i vetëm midis tyre është nëse do të zgjasë me vite apo muaj. Askush nuk parashikon se lufta do të përfundojë për dy apo tre javë”, tha Pendarovski.

Për sa do të ndikojë e gjithë kjo tek ne, Pendarovski thotë se nga ana ushtarako-politike kemi obligime të qarta si anëtare e NATO-s dhe po ndihmojmë në mënyrë aktive sipas resurseve tona.

“Përsa i përket çmimeve të larta të energjisë dhe ushqimeve, në muajt e ardhshëm ose dimrin e ardhshëm do të ndajmë fatin e Evropës. Për shkak se jemi një vend me burime të kufizuara, do të vuajmë më shumë, pasi nuk kemi mekanizëm kaq të fortë mbrojtës si Gjermania apo Franca”, tha Pendarovski.