Nxënësit nuk do ta kalojnë kufirin në këmbë, prej shtatorit do të jetë gati objekti i shkollës në fshatin Bllacë, premtoi ministri
Ministria për Arsim dhe Shkencë ka premtuar që prej shtatorit të këtij viti do të pranohen nxënësit në shkollën fillore “Mihal Grameno” në fshatin Bllacë, transmeton Portalb.mk.
“Nga shtatori i këtij viti, fëmijët e moshës shkollore nga fshati Bllacë e Poshtme i komunës së Çuçer Sandevës nuk do ta ndjekin më mësimin në shtet tjetër, përkatësisht në një zonë kufitare në Kosovë ku gjendet shkolla e tyre më e afërt, por do të mësojnë në një objekt në vendlindjen e tyre që është në ndërtim e sipër dhe aktivitetet ndërtimore janë kah fundi”, deklarojnë nga MASH-i.
Nxënësit e këtij fshati që shtrihet në territorin e Maqedonisë së Veriut, çdo ditë kanë udhëtuar në këmbë përmes pikës kufitare për të kaluar në komunën më të afërt të Kosovës, në Hanin e Elezit. Shumica e nxënësve të këtij fshati deri më tani kanë ndjekur mësimin në shkollën fillore “Ilaz Thaçi” në Hanin e Elezit.
“Me këtë investim ne i japim fund një absurditeti dhe një padrejtësie për nxënësit tanë të cilëve shteti duhet t`u sigurojë kushte për mësim dhe jo t`i detyrojë të mësojnë jashtë kufijve të vendit”, deklarojnë nga Ministria.
Raportohet që shpenzimet për ndërtimin e këtij objekti raportohet janë 4.7 milionë denarë, punime që kishin filluar vitin e kaluar, përkundër se ishin premtuar shumë më herët.
