Shkupi shënoi Ditën Botërore të Artit me ekspozita, filma, muzikë (FOTO)
Shkupi të premten shënoi Ditën Botërore të Artit me ekspozita, shfaqje të disa filmave studentore, performancave, me biseda mbi artin dhe kulturën dhe e gjithë kjo e ndjekur me një muzikë, shkruan Portalb.mk.
Në Suli An dje u shënua Dita Botërore e Artit me një organizim nga Europe House në bashkëpunim me studentët e Fakultetit të Arteve të Bukura dhe Fakultetit të Arteve Dramatike.
Nëpërmjet eventit gjithëditor i cili u organizua, artdashësit patën mundësinë të shijojnë mbi 40 vepra arti të studentëve të FAB, shfaqje të disa filmave studentorë të FAD dhe performanca.
Dita Botërore e Artit festohet çdo vit më 15 Prill, për të promovuar zhvillimin, diversitetin, përhapjen dhe kënaqësinë e artit. Nën kujdesin e UNESCO-s, kjo ditë synon të rrisë ndërgjegjësimin për aktivitetet krijuese në mbarë botën.
