Rusia ndaloi Amnesty International, Human Rights Watch dhe organizata të tjera ndërkombëtare
Autoritetet shtetërore ruse njoftuan dje se po ndalojnë punën e 15 organizatave ndërkombëtare në territorin e tyre, duke përfshirë Amnesty International, Human Rights Watch, Fondacionet Friedrich Naumann, Friedrich Ebert, Heinrich Bell, Aga Khan dhe Carnegie dhe të tjera, raporton Radio Evropa e Lirë.
Ky hap i Kremlinit vjen pasi Rusia nisi një ofensivë ushtarake kundër Ukrainës më 24 shkurt, duke bërë që Asambleja e Përgjithshme e OKB-së të përjashtonte Rusinë nga Këshilli i OKB-së për të Drejtat e Njeriut disa ditë më parë për krimet e saj të luftës në Ukrainë.
Amnesty International raporton për mbylljen e zyrës në Moskë: “Kur Kremlini përpiqet t’ju heshtë, atëherë ju jeni duke bërë gjënë e duhur”, ka shkruar Sekretarja e Përgjithshme e Amnesty, Agnes Kalamar, përcjell Deutsche Welle.
Human Rights Watch operon në Rusi për 30 vjet, ndërsa Amnesty International ka qenë e pranishme në vend që nga viti 1993.
Pa dhënë informacion të detajuar për ndalimin e punës, Ministria ruse e Drejtësisë përmes një komunikate vetëm ka njoftuar për vendimin.
“Ata u hoqën nga regjistri i organizatave ndërkombëtare së bashku me 13 OJQ të tjera të huaja për ‘shkelje të legjislacionit aktual të Federatës Ruse'”, tha Ministria Ruse e Drejtësisë në një deklaratë.
Human Rights Watch dhe Amnesty International tashmë kanë njoftuar se pavarësisht ndalimit të punës në Rusi, do të vazhdojnë të punojnë në këtë vend, duke theksuar se do të vazhdojnë të dokumentojnë shkeljet e të drejtave të njeriut në Rusi.
Edhe para fillimit të agresionit ushtarak kundër Ukrainës, Rusia ka ndërmarrë vazhdimisht hapa radikalë jodemokratikë, duke filluar me përfshirjen e intelektualëve kritikë, gazetarëve dhe figurave publike si “agjentë të huaj” në listën e Ministrisë së Drejtësisë. Së fundmi, u gjetën gjashtë persona të tjerë nga Rusia, përfshirë reperin e njohur rus Face (Ivan Dremin), i cili foli kundër fushatës ushtarake në Ukrainë dhe u largua nga vendi në shenjë proteste.
