RMV, hetim kundër një kryetari të komunës dhe katër personave tjerë për keqpërdorim të detyrës dhe pastrim parash

Prokurori përkatës kompetent për Krim të Organizuar dhe Korrupsion, ka miratuar urdhër për zbatimin e procedurës hetuese kundër pesë personave, njofton Portalb.mk.

“Me veprimet e përshkruara në urdhër, i dyshuari i parë – kryetar i komunës dhe i dyshuari i tretë organ mbikëqyrës në komunë, si bashkëkryerës, kanë kryer vepër penale të vazhduar Keqpërdorim të detyrës dhe autorizimit zyrtar gjatë furnizimeve publike, a i dyshuari i dytë si pronar i vërtetë i dy firmave dhe vëlla i të dyshuarit të parë, ka kryer dy vepra penale Keqpërdorim të detyrës dhe autorizimit zyrtar dhe Pastrim parash dhe të ardhurave tjera nga vepra e dënueshme. Të dyshuarit të katërt – pronar dhe drejtues i firmës tanimë të fshirë, i ngarkohet vepra se në vazhdimësi ka ndihmuar në lidhje me veprën penale Pastrim parash, derisa të dyshuarit të pestë drejtues i ndërmarrjes që drejtues është i dyshuari i dytë, ka kryer Keqpërdorim të procedurës për thirrje publike, ndarje të marrëveshjes për furnizim publik ose partneritet publiko-privat”, thuhet në njoftimin e Prokurorisë.

Sipas Prokurorisë, në afat prej gjashtë viteve, prej vitit 2012-të deri në vitin 2018-të, të nxitur nga i dyshuari i dytë, parë dhe tretë, e kanë keqpërdorur detyrën e tyre zyrtare dhe kanë përfituar për tjetër me çka e kanë dëmtuar buxhetin e komunës, derisa i dyshuari i katërt, duke dhënë fatura me përmbajtje të pavërteta te firma e të dyshuarit të dytë, i cili nuk ka evidentuar, i ka ndihmuar që ta kryejë veprën penale Pastrim parash.

“I dyshuari i pestë me dorëzim të dokumentacionit me përmbajtje të pavërtetë me vetëdije i ka shkelur dispozitat e procedurës për ndarje të marrëveshjes për furnizim publik dhe në atë mënyrë ka realizuar për tjetër përfitim pasurie të përmasave të mëdha”, shtojnë nga Prokuroria.