Lajçak: Maqedonia e Veriut është partner i besueshëm i Unionit
Kryeministri Dimitar Kovaçevski i ka vazhduar aktivitetet në Konferencën për Siguri në Munih, gjatë së cilës është takuar me përfaqësuesin e BE-së për Ballkanin Perëndimor, Mirosllav Lajçak, njofton Portalb.mk.
“Në takimin në të cilin ka marrë pjesë edhe zv.kryeministri për Çështje Evropiane, Bojan Mariçiq, kryeministri Kovaçevski e ka njoftuar Lajçakun me aktivitetet e përbashkëta me kryeministrin e bullgarisë, Kiril Petkov, që të intensifikohet bashkëpunimi edhe për pesë grupet punuese për ekonomi, infrastrukturë, kulturë, eurointegrim dhe histori, të cilët kanë për detyrë të përgatisin udhërrëfyes për zbatimin e Marrëveshjes për Fqinjësi të Mirë”, thuhet në kumtesë.
Lajçak ka dërguar mbështetje për integrimin e Maqedonisë së Veriut në BE. Ai ka shprehur kënaqësi për përkushtimet e deritanishme dhe i ka vlerësuar si kontribut të rëndësishëm drejt vendimit final për miratimin e kornizës ligjore dhe për caktimin e konferencës së parë në mandatin e Francës si udhëheqëse me Këshillin e Evropës.
Në takim është diskutuar edhe për avancimin e bashkëpunimit rajonal mes vendeve të Ballkanit Perëndimor dhe për procesin, siç thuhet në kumtesë, inkurajues të “Ballkanit të Hapur”.
