Po legalizohet ndërtimi në fshatrat e zonave të mbrojtura, reagojnë ambientalistët
Shoqata Ekologjike Qytetare “Fronti 21/42” reagon lidhur me ndryshimet e fundit të Ligjit për Planifikim Urbanistik të propozuar nga Ministria për Transport e Lidhje, për të cilat kjo ministri nuk ka organizuar debat publik. Dy ditë më parë skadoi afati për komente lidhur me Projektligjin e bashkëngjitur në ENER dhe “Fronti 21/42” ka disa vërejtje, shkruan Meta.mk, transmeton Portalb.mk.
Ekologët reagojnë se ndryshimet e propozuara ligjore mundësojnë urbanizim të fshatrave në zonat e mbrojtura pa bërë vlerësim të ndikimit mbi mjedisin jetësor.
“Qeveria sërish po e mundëson urbanizimin e fshatrave, në zonat e mbrojtura, siç janë Skudrinja në Parkun Kombëtar Mavrovë; Llagadini, Lubanishta dhe Elshani që janë pjesë e Trashëgimisë Botërore Natyrore dhe Kulturore në Rajonin e Ohrit – pa bërë vlerësim se si do të ndikojë mbi natyrën dhe pa e përfshirë publikun në këtë proces të vlerësimit”, reagojnë nga Fronti 21/42.
Ata kritikojnë gjithashtu se ndryshimet ligjore mundësojnë shndërrim automatik të çdo lloj toke në tokë ndërtimore, nëse është pjesë e ndonjë projekti urban jashtë planit urbanistik.
“Sipas ligjeve aktuale, për të urbanizuar një zonë që është jashtë planit urbanistik, e në të cilën ka tokë bujqësore, pyje, brez të bregut etj. duhet të realizohet proces i shndërrimit në tokë ndërtimore, i cili nga ana tjetër rregullohet me ligje specifike për llojin specifik të tokës (p.sh. Ligji për Tokë Bujqësore, Ligji për Pyjet, etj.)”, shpjegojnë nga “Fronti 21/42”.
Ndryshimet e propozuara në Ligjin për Urbanizëm i pengojnë qytetarët që të sfidojnë programet urbanistike, duke parashtruar ankesë kundër vendimit për miratimin e tyre.
Nga “Fronti 21/42” reagojnë edhe për shkak se ndryshimet e reja ligjore për të cilat duhet të vendosë Kuvendi i RMV-së e përkufizojnë planifikimin urban dhe zbatimin e planeve urbane si aktivitet me interes publik.
“Kjo ndërhyrje në dukje e vogël ka potencial të bëjë kërdi në natyrën tonë. Për shembull, Ligji për Pyjet e ndalon gërmimin dhe shndërrimin e përhershëm të pyjeve, përveç në kushte të caktuara, duke përfshirë realizimin e aktiviteteve me interes publik. Me ligjin aktual nuk mund të shkatërrohet një pyll për të realizuar një plan/projekt urbanizimi, kurse me ndryshimet e propozuara kjo derë hapet”, thonë nga “Fronti 21/42”.
Ambientalistët paralajmërojnë se nëse miratohen ndryshimet në Ligjin për Planifikim Urbanistik, ato mund të çojnë në shkatërrim edhe më të madh në natyrën dhe trashëgiminë kulturore të vendit.
Ndryshe, vitin e kaluar pati një reagim të ashpër për ndryshimet e planifikuara në Ligjin për Planifikim Urbanistik, me të cilat atëherë propozoheshin ndryshime në nenin 35 që linte hapësirë për ndërtime sipas Planit të Detajuar Urbanistik (PDU) që është në kundërshtim me Planin e Përgjithshëm Urbanistik (PPU). Ndryshimet e tilla më pas u tërhoqën nga Ministria e Transportit dhe Lidhjeve në fillim të verës së kaluar.