Deri më 1 mars të rinjtë e Maqedonisë së Veriut mund të aplikojnë për bursa studime në Britaninë e Madhe
Ministria për Arsim dhe Shkencë ka bërë të ditur që së bashku me Fondin britanik për bursa do të ndajnë gjashtë bursa për të rinjtë e Maqedonisë së Veriut për të studiuar në Britani, transmeton Portalb.mk.
“Fondi britanik për bursa – British Scholarship Trust do të ndajë gjashtë bursa për studime të shkurtër (nga 1 deri tre muaj) për hulumtuesit e rinj nga Republika e Maqedonisë së Veriut në institucionet për arsim të lartë dhe shkencë në Britaninë e Madhe për vitin 2022”, njoftoi Ministria, duke bërë të ditur që afati për aplikim është deri më 1 mars.
Studentët që nuk janë mbi 30 vjeç, do të marrin mbështetje financiare prej 900 funta në muaj, gjegjësisht 1000 funta në muaj nëse institucionet janë në qendër të Londrës.