Tetovë, u hap kënd lojërash për fëmijët me aftësi ndryshe në shkollën “Naim Frashëri”
Sot në ditën ndërkombëtare të personave me aftësi ndryshe, në hapësirat e shkollës fillore “Naim Frashëri” në Tetovë u hap një kënd lojërash gjithëpërfshirës nga projekti “Be IN, Be Inclusive, Be Included”, që për qëllim ka përfshirjen e nxënësve me aftësi ndryshe, shkruan Portalb.mk.
Ky projekt u zbatua nga Fondacioni për Iniciativa Arsimore dhe Kulturore “Hap pas Hapi” së bashku me partnerët e saj Shoqatën për ofrimin e shërbimeve për personat me aftësi ndryshe “Handimak” dhe Shoqata për Promovimin dhe Zhvillimin e Shoqërisë Gjithëpërfshirëse “Inclusive”.
“Deri më tani kemi ndarë 664 bursa për nxënës me aftësi ndryshe, kemi trajnuar 300 mësues dhe kemi përmirësuar kushtet në shkollat më të mëdha. Ne kemi ndërtuar pesë kënde lojërash të tjera, pesë dhoma me sensorë dhe teknologji ndihmëse në katër kënde lojërash. Ne gjithashtu mbështesim familjet dhe prindërit. Për këtë shkollë është e rëndësishme që jo vetëm të përmirësojë kushtet, por tashmë është traditë përfshirja e të gjithë nxënësve, tha Elena Mishiq, udhëheqëse e ekipit në projekt.
Adem Idrizi, kryetar i Handimak tha se në lidhje me këtë janë përpjekur vazhdimisht që të ndërgjegjësojnë popullatën për rëndësinë e përfshirjes së personave me aftësi ndryshe në jetën e përgjithshme shoqërore.
Besar Durmishi kryetar i këshillit komunal të Tetovës, tha se aftësitë ndryshe nuk do të thonë vetëm çështje e shëndetit publik por është edhe çështje thelbësore e të drejtave të njeriut.
“Ne si komunë duhet të bëjmë më shumë që këta fëmijë të ndjehen të barabartë me fëmijët e tjerë.” tha Besar Durmishi.
Ky projekt u financua nga Bashkimi Evropian dhe me këto aktivitete projekti përfundoi 15 muaj pune drejt përfshirjes thelbësore të nxënësve me aftësi ndryshe në shkollat e rregullta fillore.
Ndryshe, Dita ndërkombëtare e personave me aftësi ndryshe shënohet çdo vit në 3 dhjetor dhe ka për qëllim promovimin e një pjesëmarrjeje të plotë dhe të barabartë të personave me aftësi ndryshe dhe ndërmarrjen e aktiviteteve për përfshirjen e këtyre personave në të gjitha aspektet e shoqërisë.
Kjo datë për herë të parë u shpall në vitin 1992 nga rezoluta 47/3 e Asamblesë së Përgjithshme të Kombeve të Bashkuara dhe synon të mobilizojë mbështetjen për dinjitetin, të drejtat dhe mirëqenien e personave me aftësi ndryshe.
Tema e këtij viti për këtë ditë është “udhëheqja dhe pjesëmarrja e personave me aftësi ndryshe drejt një bote gjithëpërfshirëse, të qasshme dhe të qëndrueshme pas Covid-19″, ideja është që të rrit ndërgjegjësimin për përfitimet e integrimit të personave me aftësi ndryshe në aspektet politike, sociale, jetën ekonomike e kulturore dhe shoqërinë më të gjerë.
