Shkup, nesër do të mbahet panel diskutim për luftën kundër trafikimit me qenie njerëzore

Trafikimi i qenieve njerëzore është problem global dhe një nga krimet më të turpshme në botë, që prek jetën e miliona grave, burrave dhe fëmijëve në mbarë botën, duke i shfrytëzuar dhe privuar nga dinjiteti i tyre. Për të luftuar këtë fenomen të tmerrshëm nevojiten veprime të koordinuara dhe të përbashkëta, pra partneritete në të gjitha fushat si parandalim, mbrojtje dhe ndjekje penale, transmeton Portalb.mk.

Ngjarja “Lufta kundër trafikimit me qenie njerëzore në Maqedoninë e Veriut – Parandalimi, Ndjekja, Mbrojtja dhe Partneritetet” do të ofrojë mundësi për partnerët kombëtarë dhe ndërkombëtarë që të diskutojnë situatën dhe arritjet aktuale, të diskutojnë sfidat, të propozojnë rekomandime ,të konfirmojnë dhe forcojnë bashkëpunimin në përpjekjet e tyre për çrrënjosjen e trafikimit të qenieve njerëzore.

Zyrtarë të lartë qeveritarë, partnerë kombëtarë dhe ndërkombëtarë do të përfshihen në një diskutim të hapur dhe do të shkëmbejnë informacione për luftimin e trafikimit me qenie njerëzore në Maqedoninë e Veriut, një ngjarje e organizuar bashkërisht nga Ambasada e Suedisë, Ambasada e Francës dhe Misioni i OSBE-së në Shkup.

Folësit kryesorë do të jenë Anna Extend, Ambasadore Speciale për Luftën kundër Trafikimit të Qenieve Njerëzore në Ministrinë e Punëve të Jashtme Suedeze, Jean-Claude Brune, Ambasador për Luftën kundër Kërcënimeve Kriminale Transnacionale në Ministrinë Franceze të Evropës dhe Punëve të Jashtme, Jeff Goldstein, Zëvendës Drejtor i Misionit të OSBE-së në Shkup dhe Svetlana Vlahovi–Dimanovska, zëvendës koordinatore nacionale e Komisionit Kombëtar për Luftën kundër Trafikimit të Qenieve Njerëzore dhe Migrimit Ilegal.

Në panelin e diskutimit do të marrin pjesë edhe përfaqësues të IOM-it, Qendrës Kombëtare për Viktimat e Trafikimit me Qenie Njerëzore dhe Dhunës Seksuale – Porta e Hapur / La Strada, Asociacioni i Juristëve të Rinj Maqedonas , si dhe Komisioni kombëtar dhe Zyra e Prokurorit Publik.

Pjesëmarrësit do të ndajnë informacione dhe do të diskutojnë situatën aktuale, si dhe sfidat dhe kërcënimet që lindin në një kohë kur bota po përballet me pandeminë Covid-19 dhe fenomenin e ri të rritjes së (keq)përdorimit të internetit për qëllime shfrytëzimi.