COP 26 finalizoi Marrëveshjen e Parisit për ndryshime klimatike

Konferenca e 26-të për ndryshime klimatike (COP 26) përfundoi sot në Glasgow,me çka rreth 200 shtete janë dakorduar për Paktin e Klimës të Glasgouit për të mbajtur 1.5C gjallë dhe për të finalizuar elementet e jashtëzakonshme të Marrëveshjes së Parisit. Negociatorët e klimës i dhanë fund dy javëve të bisedimeve intensive të shtunën me konsensus për të përshpejtuar urgjentisht veprimin mbi klimën, transmeton Portalb.mk.

“Pakti i Klimës i Glasgouit, kombinuar me ambicien dhe veprimin në rritje nga shtetet, do të thotë se 1.5C mbetet në dukje, por mund të realizohet vetëm me përpjekje të përbashkëta dhe të menjëhershme globale. Pakti i Glasgouit do të përshpejtojë ritmin e veprimit për klimën. Të gjitha vendet ranë dakord për të rishqyrtuar dhe forcuar objektivat e tyre aktuale të emetimit deri në vitin 2030, të njohur si Kontributet e përcaktuara kombëtare (NDC), në vitin 2022. Kjo do të kombinohet me një tryezë të rrumbullakët politike vjetore për të konsideruar një raport global të përparimit dhe një Samit të liderëve në 2023”, njoftuan nga ambasada britanike në Shkup.

Në njoftimin e ambasadës më tej theksohet se, rregullorja e Parisit, udhëzimet për mënyrën se si do të realizohet Marrëveshja e Parisit, u kompletua gjithashtu sot pas gjashtë vitesh diskutime. Kjo do të lejojë realizimin e plotë të marrëveshjes historike, pas marrëveshjes mbi një proces transparence që do t’u kërkojë llogari vendeve gjatë realizimit të objektivave të tyre. Kjo përfshin nenin 6, i cili krijon një kornizë të fuqishme për vendet për të shkëmbyer kreditë e karbonit nëpërmjet UNFCCC.

“Vendimet e COP shkuan më tej se kurrë më parë në njohjen dhe trajtimin e humbjeve dhe dëmeve nga ndikimet ekzistuese të ndryshimit  të klimës. Kishte gjithashtu angazhime për të rritur dukshëm mbështetjen financiare nëpërmjet Fondit për përshtatje ndërsa vendeve të zhvilluara u kërkua që të dyfishojnë mbështetjen e tyre për vendet në zhvillim deri në vitin 2025. Teksti përfundimtar COP26 pason dy vjet të diplomacisë intensive dhe fushatës të ndërmarrë nga Presidenca e Mbretërisë së Bashkuar për të rritur ambicien dhe për të siguruar veprim nga pothuajse 200 vende. Puna u përqendrua në reduktimin e emetimeve në afat të shkurtër për të kufizuar rritjen e temperaturës në 1.5C, duke mobilizuar si financat publike ashtu edhe ato private dhe mbështetjen e bashkësive për t’iu përshtatur ndikimeve klimatike”, thuhet në njoftim.

Kur Mbretëria e Bashkuar mori rolin e COP26, në partneritet me Italinë, gati dy vjet më parë, vetëm 30% e botës kishin objektivën e zeros neto. Kjo shifër tani është rreth 90%. Gjatë të njëjtës periudhë, 154 Palë kanë dorëzuar objektiva të reja kombëtare, që përfaqësojnë 80% të emetimeve globale.

Presidenca e Mbretërisë së Bashkuar ka qenë gjithashtu e përqëndruar për të shtyrë veprimin në zvogëlimin e emetimeve. Kemi parë ndryshim të madh në përdorimin e thëngjillit, ku shumë më shumë vende të tjera janë angazhuar për të hequr gradualisht energjinë e vazdueshme që vjen nga thëngjilli dhe për t’i dhënë fund financimit ndërkombëtar të thëngjillit.

Krahas kësaj, kemi parë një angazhim të dukshëm për të mbrojtur habitatet e çmuara natyrore, me 90% të pyjeve të botës të mbuluara nga një zotim nga 130 vende për t’i dhënë fund shpyllëzimit deri në vitin 2030.

Ndërsa për rrugët e botës, kalimi në zero emetimin për automjetet është duke ndodhur me hap më të shpejtë, ku disa nga prodhuesit më të mëdhenj të automjeteve po punojnë së bashku për të bërë të gjitha shitjet e makinave të reja me zero emetim të karbonit deri në vitin 2040 dhe deri në vitin 2035 në tregjet kryesore. Vendet dhe qytetet po ndjekin shembullin me datat ambicioze për ndërprerjen e makinave me benzinë dhe me naftë.

Politikat e tanishme do të na lënë në rrugën drejt një rritjeje shkatërruese të temperaturës. Por puna e bërë nga ekspertët e pavarur tregon Climate Action Tracker se me zbatimin e plotë të angazhimeve të reja kolektive mund të mbajmë rritje të temperaturës në 1.8C.

Edhe me veprimin e kryer gjatë dhe para COP26, bashkësitë anembanë botës do të vazhdojnë të ndjejnë ndikimin nga ndryshimi i planetit tonë.

Duke reflektuar mbi detyrën përpara, Presidenti i COP26 Alok Sharma tha:

“Ne tani mund të themi me besueshmëri se kemi mbajtur 1.5 gradën gjallë. Por, pulsi i tij është i dobët dhe do të mbijetojë vetëm nëse i mbajmë premtimet tona dhe i përkthejmë angazhimet tona në veprim të shpejtë. I jam mirënjohës UNFCCC-së që ka punuar me ne për të realizuar një COP26 të suksesshëm. Nga këtu, ne tani duhet të shkojmë përpara së bashku dhe të realizojmë pritjet e përcaktuara në Paktin e Glasgouit për klimën dhe të mbyllim hendekun e gjerë që mbetet. Sepse siç na tha kryeministrja Mia Mottley në fillim të kësaj konference, për Barbadosin dhe shtetet e tjera të vogla ishuj, ‘dy gradë është një dënim me vdekje’. Do të varet nga të gjithë ne që të mbajmë 1.5 gradë brenda arritjes dhe të vazhdojmë përpjekjet tona që të kemi financa rrjedhëse dhe të rrisim përshtatjen. Pas dedikimit kolektiv që ka dhënë Pakti i Klimës në Glasgou, puna jonë këtu nuk guxon të humbet.”