Sot voton një pjesë e qytetarëve të Maqedonisë së Veriut, ka heshtje zgjedhore

F1 C 10:31, 16-10-2021

Zgjedhje, vota, votim — Zgjedhje, foto nga Portalb.mk / Arbnora Memeti

Komisioni Shtetëror i Zgjedhjeve sot duhet të realizojë procesin zgjedhor për të sëmurët, ata që nuk kanë mundësi dhe personat që janë në karantinë për shkak Kovid-19, transmeton Portalb.mk.

“Votimi për të sëmurët dhe të pamundurit do të bëhet më 16 tetor. Gjithsej 7891 persona për të sëmurët dhe të paaftë paraqitën kërkesë në Komisionet Komunale të Zgjedhjeve për të votuar, nga të cilët 3.545 persona janë pranuar deri më tani, dhe 283 persona janë refuzuar”, vendosi Komisioni Shtetëror i Zgjedhjeve në seancën e 30-të, duke sqaruar vazhdon përpunimi i kërkesave.

Sot duhet të votojnë gjithashtu edhe personat që janë në karantinë shtëpiake për shkak se janë pozitiv me Kovid-19 ose ata që janë në vetizolim, e drejtë që tashmë do të shfrytëzohet nga 476 persona që janë regjistruar në afat kohor.

Në seancën e XXIX-të, KSHZ-ja realizoi zgjedhje të rastit për kryetar dhe anëtar të këshillave të veçanta zgjedhore që do të zbatojnë votimin e personave që janë në karantinë shtëpiake për shkak të testit pozitiv me Kovid-19 dhe personave të cilëve u është caktuar masa e vetëizolimit.

Ekzistojnë pesë grupe të votuesve që votojnë një ditë para ditës së zgjedhjeve: personat e pafuqishëm dhe të sëmurë dhe personat që janë në arrest shtëpie; personat që vuajnë dënimin me burg ose janë në paraburgim; personat e shpërngulur brenda vendit; personat në karantinë shtëpiak ose në vetëziolim; personat të cilët gjatë zgjedhjeve janë në përkujdesje në institucionet për përkujdesje jashtëfamiljare.

Çfarë do të thotë heshtja zgjedhore?

Heshtja zgjedhore hyn në fuqi një ditë para zgjedhjeve ( e shtunë), gjegjësisht, në mesnatë mes të premtes dhe të shtunës, kur mbaron fushata zgjedhore. Heshtja vazhdon deri në ora 19, në ditën e votimeve (e diel). Kjo nënkupton se propaganda, agjitimi partiak, ryshfeti i votuesve, fushata dhe shkelje tjera të Kodit Zgjedhor janë rreptësishtë të ndaluara.

Gjatë heshtjes zgjedhore informohet për zgjedhjet dhe rrjedhën e votimeve, por ndërpriten të gjitha format e paraqitjes zgjedhore mediatike.

Sipas Kodit Zgjedhor, si shkelje e heshtjes zgjedhore vlerësohet emetimi i informatave të çdo lloji, fotografive, materialeve audio dhe audio-vizuale lidhur me, ose të cilat kanë marrë pjesë në zgjedhjet, çdo formë të raportimit mediatik të cilat janë në funksion të hapur ose të fshehtë të ndonjë fushate zgjedhore dhe mund të ndikojnë mbi vendimet e votuesve, të dhëna me të cilat e zbulojnë identitetin e subjekteve politike dhe/ose të individëve të përfshirë në incidente ose parregullsi tjera në ditën e votimeve, si dhe paraqitje nga kandidatë në procesin zgjedhor, nga përfaqësues të partive politike dhe nga bartës të funksioneve në organet e pushtetit.