fbpx

Sot zyrtarisht fillon fushata për zgjedhjet lokale

Fushata zyrtare për zgjedhjet lokale, raundi i parë i të cilave është caktuar për 17 tetor, fillon sot. Sipas të dhënave të KSHZ -së, në garë janë rreth 11 mijë kandidatë për kryetarë dhe këshilltarë në 80 komuna në vend, transmeton Portalb.mk.

Sipas të dhënave të KSHZ -së, 301 kandidatë konkurrojnë për kryetar komune, me dominim absolut mashkullor, ku vetëm 8.31% e kandidatëve janë gra. Më shumë kandidatë ka për Shkupin- 12, ndjekur nga Struga dhe Dollneni, me nga tetë kandidatë secila, ndërsa në dhjetra komunash ka vetëm nga dy kandidatë për kryetarë komune. Gjithësej janë 24 kandidatë të pavarur.

Mbi 10,600 kandidatë janë të përfshirë në garën për këshilltarë. 675 prej tyre në 15 lista janë në garë për këshilltarë në qytetin e Shkupit, si njësi speciale e vetëqeverisjes lokale, këshilli i të cilit ka 45 anëtarë. Listat më të pakta ku janë vetëm dy, me gjithsej 18 kandidatë, janë në Vevçan.

Në zgjedhjet lokale të tetorit, 1,824,864 qytetarë kanë të drejtë vote, të regjistruar në listën e votuesve që KSHZ përfundoi të Premten.

Në këto zgjedhje, për herë të parë do të përdoren aparatet për skenimin e gjurmëve të gishtërinjve, për të identifikuar votuesit. Gjithashtu parashikohet mundësia e votimit me dokumente personale të skaduara, si dhe nëse personi nuk është regjistruar fillimisht në listën e votuesve, por i plotëson kushtet për të ushtruar të drejtën e votës.

Në listë janë gjithsej 122 parti, koalicione, kandidatë dhe lista të pavarura. KSHZ, tani më ka realizuar shortin për renditjen e partive politike në fletëvotim në zgjedhjet e 17 tetorit.

Kjo është renditja në fletëvotim:

  1. Opsioni Qytetar për Maqedoninë – GROM
  2. Lëvizja “Të vendosur për ndryshime” – LDP dhe DOM
  3. Bashkimi Demokratik për Integrim
  4. Koalicioni “Të gjithë bashkë” i përbërë nga BDI, ASH dhe AAA
  5. Aleanca për Shqiptarët
  6. Aleanca për Shqiptarët dhe Alternativa
  7. VMRO-DPMNE dhe Koalicioni “Ripërtëritja e Maqedonisë”
  8. Partia Demokratike e Turqve të Maqedonisë
  9. LSDM
  10. Alternativa
  11. PDSH
  12. Koalicioni “Më e mira për komunën time”, i udhëhequr nga LSDM
  13. 13 Partia për Lëvizjen e Turqve në Maqedoni
  14. VMRO – Partia popullore
  15. “E Majta”
  16. Lëvizja Besa

Këto zgjedhje, të tretat me radhë pas zgjedhjeve të parakohshme parlamentare të vitit të kaluar dhe zgjedhjeve shtesë për kryetarët e komunave të Shtipit dhe Pllasnicës, organizohen me protokolle Covid, si dhe parashikohet votimi në izolim.

Kryetari i kuvendit, Talat Xhaferi shpalli zgjedhjet lokale më 7 gusht për t’u mbajtur me 17 tetor. Fushata para raundit të parë duhet të përfundojë më 15 tetor, kur fillon edhe heshtja zgjedhore në mesnatë, ndërsa rrethi i dytë për kandidatët për kryetarë komunash do të zhvillohet më 31 tetor, konkretisht  në komunat ku nuk do të ketë fitues pas raundit të parë të votimit më 17 tetor.

Lajme të ngjashme

Leave a Reply

Your email address will not be published. Required fields are marked *

Back to top button