Ëndrra e Fionës Konxhelit është që të hap një klub për gjimnastikë ritmike në Kosovë (VIDEO)
Mungesa e një klubi të gjimnastikës ritmike në Kosovë bëri që Fiona Konxhelin, që në moshë shumë të re, të zhvendoset në Maqedoninë e Veriut. Fiona është 22-vjeçare dhe vjen nga Ferizaji. Që e vogël, prindërit e saj i kanë parë lëvizjet dhe fleksibilitetin që ajo posedon. Kështu ata bënë të pamundurën që të gjenin një vend për të ushtruar Fiona këtë sport. Klubi i vetëm me gjimnastikë ritmike që gjetën ishte ai në Shkup, shkruan Portalb.
“Meqë në Kosovë nuk kishte klub të gjimnastikës ritmike, në moshën 7-vjeçare nisa me balet. Brenda kësaj kohe, kam hulumtuar për klube të gjimnastikës ritmike jashtë Kosovës. Kërkova në Shqipëri, por, as atje nuk kishte. Në fund, gjetëm një klub në Shkup ku zhvillohej kjo disiplinë sportive. Kështu vendosa që në moshën 15-vjeçare të shpërngulem në Shkup dhe u regjistrova në shkollën e mesme “Metodi Mitevski-Brico” në drejtimin Edukata Fizike. Brenda dy viteve unë mësova gjuhën maqedonase dhe menjëherë fillova gjimnastikën ritmike në klubin Ritmiko.” tha Fiona
Me regjistrimin në Ritmiko, Fionës iu dha mundësia që të marrë pjesë në gara ndërkombëtare. Në të dyja garat ku mori pjesë fitoi çmime. Në Serbi Fiona fitoi vendin e dytë dhe në Bullgari vendin e tretë. Në vitin 2020 ishte e planifikuar që të merrte pjesë edhe në Bosnja dhe Hercegovina, por, pandemia ishte ajo që ia prishi planet. Tani Fiona po përgatitet për garat e ardhshme ndërkombëtare.
Mesazhi që Fiona përcolli për të gjithë artistët e rinj është:
“Mos ndaloni asnjëherë. Punoni shumë. Pa pasur parasysh kushtet minimale që ne i kemi, mos ndaloni. Luftoni për ëndrrat tuaja.” u shpreh Fiona
Gjimnastika ritmike është profesioni që e ushtron me shumë vullnet. Fiona tani është bërë trajnere në klubin Ritmiko dhe ushtron fëmijë të moshës së vogël. Planifikon që studimet t’i fillojë jashtë vendit, por, ende nuk ka asgjë konkrete. Ajo që dihet është se do të ushtrojë ende deri sa ta përsos gjimnastikën ritmike. Ëndrra e Fionës është që një ditë të hap një klub për gjimnastikë ritmike në Kosovë.
