RMV, opozita shqiptare e caktoi kandidatin për kryetar të Dibrës në zgjedhjet lokalet të 17 tetorit

Aleanca për Shqiptarët dhe Alternativa kanë caktuar Bekim Pocestan kandidat për kryetar komune në Dibër gjatë Zgjedhjeve Lokale që do të zhvillohen më 17 tetor në të gjitha komunat e Maqedonisë së Veriut, transmeton Portalb.mk.

“Unanimisht u zgjodh dr.Bekim Pocesta si kandidat per kryetar te Komunes Diber. Bekimi në kohën e duhur ju përgjigj thirrjes sonë, sepse Dibrës i duhen njerëz të ndershëm në një kohë kur korrupsioni është bërë plagë e shoqërisë. Dibrës i duhet ndryshimi që njëherë e mirë të çlirohemi nga presioni politik e njerëzit të jenë të lirë e të vlerësohen për punën e ndershme dhe aftësitë e tyre profesionale”, njoftojnë nga Aleanca për Shqiptarët, parti e cila është në koalicion me Alternativën, duke formuar koalicionin opozitar.

Raportohet që Pocesta ka lindur në Dibër më 28.04.1968, shkollën fillore e ka kryer në vendlindje, të mesmen e filloi në Dibër dhe e mbaroi në Kumanovë. Fakultetin e Mjeksisë e mbaroi në “Universitetin e Prishtinës”, ndërsa Specializimin për Kardiologji e kreu në Universitetin “Nënë Tereza” në Tiranë.

“Ishte njëri ndër themeluesit e parë të “Bashkimit të Rinisë Demokratike të Maqedonisë”. Ishte kjo një periudhë me shumë aktivitete, protesta dhe demonstrata në Kosovë e Maqedoni në të cilat Bekimi gjithnë ishte aktiv. Si pasojë e këtyre aktiviteteve në vitin 1992 u dënua me dy javë burg të cilin e vuajti në Strugë-qershor të vitit 1992”, theksojnë partia nga biografia e kandidatit.

Dibra në mandatin e fundit është udhëhequr nga BDI përmes Hekuran Dukës dhe Ruzhdi Latës, pasi ky i fundit ndërroi jetë në nëntor të vitit 2018. Në zgjedhjet e fundit lokale BDI-ja ishte në koalicion parazgjedhor me LSDM-në, një koalicion tashmë i paralajmëruar edhe për zgjedhjet e 17 tetorit. Në zgjedhjet lokale të vitit 2017-të, Ruzhdi Lata (BDI) kishte 4 430 vota, ndërsa Arben Agolli (Aleanca për Shqiptarët) 3 918 vota.