Mbi 100 të vdekur nga përmbytjet në Gjermani (VIDEO)

S. B. 13:57, 16-07-2021

Numri i të vdekurve nga përmbytjet në pjesën perëndimore të Gjermanisë u rrit në 103.

Gjashtëdhjetë viktima u raportuan në landin Rajnland Falc dhe 43 në landin fqinj, Nordrajn Vesthalen.

Autoritetet paralajmërojnë se numri i viktimave mund të rritet ende.

Ekipet e shpëtimit janë duke vazhduar kërkimet për qindra njerëz të tjerë të zhdukur.

“Kam frikë se shkallën e plotë të katastrofës do ta shohim në ditët në vijim”, tha kancelarja gjermane, Angela Merkel, nga Uashingtoni, ku qëndroi për vizitë zyrtare.

Merkel premtoi mbështetje të plotë për të prekurit, duke thënë se Qeveria e saj nuk do ta lërë vetëm popullin “në këtë kohë të vështirë dhe të tmerrshme”.

#Belgium Flood.
Rue de Limbourg à #Verviers ce matin #inondations pic.twitter.com/suypO0cmUZ

— Chaudhary Parvez (@ChaudharyParvez) July 15, 2021

Presidenti i Gjermanisë, Frank-Walter Steinmeier, tha se do të udhëtojë në zonat e goditura.

Steinmeier e lidhi motin ekstrem me ngrohjen globale dhe tha se duhet të bëhet më shumë për mjedisin.

Rreth 15,000 policë, ushtarë dhe punonjës të shërbimit të urgjencës janë duke marrë pjesë në operacionet e kërkim-shpëtimit.

Helikopterët kanë nxjerrë banorët e bllokuar nga majat e çative, ndërsa tanket po pastrojnë rrugët nga pemët dhe mbeturinat e rëna.

“Askush nuk e ka pritur këtë – nga ka ardhur gjithë ky shi? Është çmenduri”, tha Annemarie Mueller, një banore 65-vjeçare nga qyteti i përmbytur Majen.

Kryeministri i landit Nordrajn Vesthalen, Armin Laschet, tha po ashtu se fajtor për motin ekstrem është ngrohja globale.

“Ne do të përballemi me ngjarje të tilla pa pushim dhe kjo do të thotë se duhet t’i përshpejtojmë masat e mbrojtjes së klimës… sepse ndryshimi i klimës nuk është i kufizuar vetëm në një shtet”, tha Laschet.

“Ne nuk e dimë ende shkallën e dëmit, por nuk do t’i lëmë vetëm komunitetet, njerëzit e prekur”, tha ai gjatë një vizite në qytetin e përmbytur Hagen.

Në frymë të ngjashme u shpreh edhe ministri i Brendshëm gjerman, Horst Seehofer. Gjermania “duhet të përgatitet shumë më mirë në të ardhmen, ky mot ekstrem është pasojë e ndryshimit të klimës”, tha ai.

Belgjika dhe Holanda janë goditur gjithashtu keq nga përmbytjet, ndërsa vërshime ka edhe në Luksemburg dhe Zvicër.

Autoritetet belge kanë raportuar për së paku 14 persona të vdekur.

Shira të furishëm parashikohen në të gjithë rajonin gjatë gjithë ditës së sotme.

Në Belgjikë, pamjet dramatike të përmbytjeve treguan makina që merrte uji përgjatë një rruge në qytetin Vervi.

#BREAKING Flood in Germany#洪水 #flut #Deutschland #Flood #Germany pic.twitter.com/VmaGGhpGGF

— Chaudhary Parvez (@ChaudharyParvez) July 15, 2021

Banorët e qytetit Liezh, zonës së tretë më të madhe urbane të Belgjikës, u urdhëruan të evakuohen. Zyrtarët lokalë thanë se ata që nuk janë në gjendje të largohen, duhet të zhvendosen në katet e sipërme të ndërtesave të tyre.

Lumi Mouz, i cili rrjedh nëpër qytet, pritet të fryhet ende. Zyrtarët janë të shqetësuar se një digë në zonë mund të shembet dhe u bënë thirrje banorëve që të ndihmojnë njëri-tjetrin.

“Situata e krizës është e jashtëzakonshme dhe solidariteti duhet të mbizotërojë”, tha autoriteti lokal përmes një deklarate.

Mbreti i Belgjikës, Philippe, dhe mbretëresha Mathilde vizituan një qendër të krizës në juglindje të qytetit Liezh, e ngritur për banorët e prekur.

Në Holandë, mbreti Willem-Alexander dhe mbretëresha Maksima inspektuan dëmet në Valeknburg – afër kufijve belgë dhe gjermanë – ku përmbytjet përfshinë qendrën e qytetit dhe detyruan evakuimin e disa shtëpive të pleqve.

Holanda nuk ka raportuar asnjë viktimë, por mijëra njerëz në qytete dhe fshatra përgjatë lumit Mouz janë inkurajuar t’i lënë shpejt shtëpitë e tyre.