RMV, në mënyrë eksprese arritën 30.000 vaksinat “Sinovak” nga Turqia

Sot në Maqedoni arritën 30.000 vaksina nga kompania kineze “Sinovak”, të dhënë si donacion nga Turqia, njoftoi në Facebook Ministri i Shëndetësisë Venko Filipçe, transmeton Portalb.mk.

“Sot, 30.000 vaksina “Sinovak” mbërritën si një donacion nga Turqia mike. Edhe një herë, unë dua të shpreh mirënjohjen time për Republikën e Turqisë dhe Presidentin Rexhep Tajip Erdogan për mbështetjen e tyre, por mbi të gjitha, për shpërndarjen e shpejtë të sasisë së premtuar, e cila është shumë e rëndësishme për ne”, shkroi Filipçe.

Vaksinat do të shpërndahen në pikat e vaksinimit në të gjithë vendin sa më shpejt të jetë e mundur, njoftoi ai.

Përndryshe, në pikat e vaksinimit në vend, përfshirë ditën e djeshme, janë vaksinuar gjithsej 250,813 qytetarë. Gjatë ditës së djeshme, janë vaksinuar gjithsej 10,556 qytetarë, ndërsa prej tyre, dozën e parë të vaksinës e morën 1,455 qytetarë,  njoftuan nga Ministria e Shëndetësisë.

Në tërë territorin e shtetit janë aplikuar gjithsej 410,711 doza vaksinash, kurse 159,898 qytetarë janë rivaksinuar.

Numri i personave që kanë shprehur dëshirë për vaksinim përmes ueb platformës vakcinacija.mk është 444,89.

Sipas shifrave të fundit, të paktën një dozë të vaksinës e kanë marrë 48 përqind e popullsisë mbi moshën 70 vjeç, 42 përqind e popullsisë mbi moshën 65 vjeç dhe 35 përqind të popullsisë mbi moshën 60 vjeç.