Në Maqedoninë e Veriut mbi 800 milionë euro mallra më shumë importohen sesa eksportohen

Në periudhën nga janari deri në prill të këtij vitit, në Maqedoninë e Veriut është rritur sasia e mallrave të eksportuara dhe importuara, por përsëri importi tregtar është më i madh për 803.8 milionë euro, transmeton Portalb.mk.

“Vlera e përgjithshme e mallrave të eksportuar nga Republika e Maqedonisë së Veriut, e shprehur në euro, në periudhën janar-prill të vitit 2021, është 2 278 124 000 euro”, raportojnë nga Enti Shtetëror i Statistikave.

Raportohet që eksporti në krahasim me periudhën janar-prill të vitit të kaluar është rritur për 40.8%, derisa importi për 34.5%.

“Vlera e mallit të importuar, në periudhën e njëjtë, është 3 081 929 000 euro, që është për 34.4 % më shumë , krahasuar me të njëjtën periudhë të vitit paraprak”, raportojnë nga Enti, duke sqaruar që mbulimi i importit me eksport është 73.9%.

Këmbim tregtar më së shumti realizohet me Gjermaninë, duke shkëmbyer 1.5 miliardë euro, prej të cilave 321 milionë janë import. Në Kosovë eksporton 84.5 milionë euro, ndërsa importon 23 milionë; nga Bullgaria importon 124.7 milionë euro, ndërsa eksporton 88.9; në Serbi eksporton 73 milionë euro, kurse importon 196.9 milionë euro.