fbpx

Dimitrov mendon se është koha për të filluar negociatat, Geer thotë se nuk ka ardhur koha për konferencën ndërqeveritare

Beteja jonë sot është në fakt betejë e Evropës me vetveten për të mbajtur fjalën e saj. Është koha që të fillojmë negociatat e merituara të anëtarësimit dhe kështu do të jemi fitues të përbashkët, tha zëvendës/kryeministri për Çështje Evropiane, Nikolla Dimitrov sot në fjalimin e tij në konferencën për shtyp me Ambasadorin e BE-së, David Geer me rastin e Ditës së Evropës, 9 maj-in. Sipas tij, është luks për ne që të presim më gjatë, shkruan Portalb.mk.

“Shumica dërrmuese e vendeve anëtare duan që ne dhe Shqipëria të fillojmë negociatat me BE-në sa më shpejt të jetë e mundur. Nga ajo që kam kuptuar mendoj se ky është qëndrimi i KE-së, i cili tashmë rekomandoi çeljen e negociatave në tetor të vitit të kaluar. Ky është qëllimi ynë dhe ne po punojmë së bashku për atë qëllim. RMV i ka përmbushur të gjitha kushtet në përputhje me parimet evropiane dhe fillimi i negociatave është një gjë e merituar. Koha, vitet dhe brezat e humbur, përparimi i treguar në vitet e fundit dhe lidershipi i treguar në zgjidhjen e çështjeve të vështira janë provë nëse mund t’i besojmë BE-së në të gjithë Ballkanin. Beteja jonë është dhe beteja e Evropës me vetveten, për të mbajtur fjalën e saj. Është koha për të filluar negociatat e anëtarësimit. Urime 9 majin, Ditën e Evropës” tha Dimitrov.

Ai njoftoi se nesër do të udhëtojë në Bruksel me kryeministrin Zoran Zaev për takim me Presidenten e Komisionit Evropian Ursula von der Layen dhe se pritjet e tij janë të dëgjojë pozicionin e BE mbi integrimin evropian të Maqedonisë.

Ambasadori i BE-së në vend, David Geer tha se KE-ja ka punuar për të caktuar konferencën ndërqeveritare me Shqipërinë dhe RMV-në, por theksoi se gjërat ende nuk kanë mbërritur në atë pikë dhe se vendimi është në duart e Këshillit Evropian, dhe se çështja e RMV-së me Bullgarinë duhet të zgjidhet.

“Bashkimi Evropian inkurajon të dy palët të arrijnë një zgjidhje të pranueshme nga të dy anët.” tha ai.

Lidhur me çështjen e ndarjes së Maqedonisë së Veriut nga Shqipëria,  që u ngrit gjatë vizitës së komisionerit Oliver Varheji ai tha se ndarja është gjithashtu vendim në duart e Këshillin Evropian të BE-së dhe se për momentin qëndrimi i KE-së mbetet i pandryshuar.

“Pozicioni i Komisionit Evropian është shumë i qartë, që nga fillimi KE është shumë e interesuar të shohë mbajtjen e konferencës ndërqeveritare me vendin tuaj, si dhe me Republikën e Shqipërisë, e cila, në fakt, do të thotë fillimi i negociatave me Maqedoninë e Veriut dhe Shqipërinë sa më shpejt të jetë e mundur. Nga ana tjetër, procesi i zgjerimit bazohet në merita dhe mendoj se të dy vendet kanë bërë shumë në kontekstin e këtij procesi. Sidoqoftë, tani është koha për të ecur përpara, për të bërë përparim”, tha ambasadori Geer.

Shqipëria dhe Maqedonia e Veriut, të dyja i kanë përmbushur kushtet dhe kanë marrë dritë jeshile për fillimin e negociatave me BE-në. Megjithatë, ky proces ka mbetur në vend numëro pasi Maqedonia e Veriut dhe Bullgaria tensionuan raportet për shkak të kontesteve historike. Sofja zyrtare kërkon që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Tito. Paraprakisht, në një dokument gjashtë faqe, me arsyetime të gjata historike për “ideologji shtetërore antibullgare” në Maqedoninë e Veriut, Bullgaria u dërgoi memorandum sqarues vendeve anëtare të BE-së në prag të vendimit për fillimin e negociatave me Unionin.

Flamuri i Maqedonisë dhe BE-së, Foto: Faktoje.al e modifikuar
Flamuri i Maqedonisë dhe BE-së, Foto: Faktoje.al e modifikuar

Ky kontest ka bllokuar procesin eurointegrues të vendit, me çka Bullgaria i vendosi dy here veto Maqedonisë së Veriut, një herë në këshillin e ministave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedono – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Delçevit.

Krerët e Maqedonisë së Veriut, megjithëse tentuan të zbusin tensionet, sërish u shprehën se nuk do të negociojnë për identitetin e tyre, pasi kjo bie ndesh me parimet themelore të vetë-përcaktimit dhe standardeve të BE-së.

Përfundimisht nga agjenda e Këshillit Evropian u hoqën edhe konkluzat për Ballkanin Perendimor më 18 dhjetor, pasi nuk kishte unanimitet te antarët e Bashkimit Evropian.

Portugalia, si kryesuese e Bashkimit Evropian, dhe Komisioni Evropian ende shpreson që deri në fund të presidencës Portugeze, 30 qershor, të mbahet konferencë ndërqeveritare me Maqedoninë e Veriut.

Lajme të ngjashme

Leave a Reply

Your email address will not be published. Required fields are marked *

Back to top button