Bekteshi: Me interkonektorin për lidhjen e gazit me Greqinë, i njëjti do të arrijë nga Azerbejxhani në tregun tonë
Ndërtimi i një sistemi kombëtar të gazit dhe lidhja e tij me sistemet rajonale, si dhe ndërtimi i sistemeve të shpërndarjes së gazit natyror, janë një nga përparësitë e Qeverisë në infrastrukturën e energjetike. Gazi natyror është lëndë djegëse e dobishme me një gamë të gjerë përdorimesh në amvisëri, industri dhe trafik, si dhe për prodhimin e energjisë elektrike dhe nxehtësisë. Kështu deklaroi Ministri i Ekonomisë Kreshnik Bekteshi në takimin ministror të Këshillit këshillëdhënës të Korridorit jugor të gazit, i cili u mbajt virtualisht në Baku, Azerbajxhan dhe në të cilin Maqedonia mori pjesë për herë të parë, njofton Portalb.mk.
“Gazifikimi i vendit është krucial për ekonominë dhe përfitojnë si qytetarët ashtu edhe kompanitë, mjedisi dhe shoqëria në tërësi. Në zhvillim e sipër janë aktivitetet për ndërtimin e mëtejshëm të sistemit ekzistues të tubacioneve të gazit në Maqedoninë e Veriut, lidhjen e tij me sistemet rajonale të tubacioneve të gazit, veçanërisht me Korridorin Jugor të Gazit, pastaj plani, zhvillimi i shpërndarjes së gazit që do të bëhet përmes partneritetit publiko-privat, por gjithashtu duke filluar negociatat për furnizimin e sasive shtesë të gazit natyror”, tha Bekteshi.
Ai shtoi se nga mesi i këtij viti është paraparë të fillojë ndërtimi i interkonektorit për lidhjen e gazit me Greqinë, i cili do të na lidhë me Korridorin Jugor të Gazit dhe kështu gazi nga Azerbajxhani do të arrijë në tregun tonë.
Korridori jugor i gazit, një projekt prej 40 miliardë dollarësh, përshkon 3.500 kilometra territor, nga Baku në Italinë e jugut, përmes Gjeorgjisë, Turqisë, Greqisë dhe Shqipërisë. Burimi kryesor i gazit për sistemin është fusha Shah Deniz në Detin Kaspik, me rezerva prej 1.2 trilion metra kub. Me përfundimin e fazës së parë të këtij korridori në dhjetor 2020, palët e interesuara po konsiderojnë zgjerimin e projektit në tregje të reja, të tilla si Ballkani, dhe tranzitin e gazit nga burime të tjera në dispozicion. Kompanitë pjesëmarrëse në projekt janë: Banka Botërore, BERZH, EIB, Banka Aziatike për Zhvillim, Banka Aziatike e Investimeve në Infrastrukturë dhe institucione të tjera financiare ndërkombëtare.
Në takimin ministror në Baku morën pjesë përfaqësues të Shteteve të Bashkuara dhe disa vendeve të Ballkanit dhe Evropës.