Tetovë, numri i kërkesave për legalizim mbi 14 mijë, Arifi larg përmbushjes së premtimit për miratimin e 7 mijë kërkesave

Edhe pse i kanë ngelur vetëm 8 muaj nga përfundimi i mandatit të dytë, kryetarja e Komunës së Tetovës, Teuta Arifi, nuk është as afër përmbushjes së premtimit për numrin e legalizimit të objekteve në këtë qytet. Ajo në debatin e Portalb.mk dhe Kallxo.com gjatë vitit 2017 premtoi legalizimin e 7 mijë objekteve, deri tani, janë miratuar gjithsej 3600 kërkesa për legalizim, numri i kërkesave, më i lartë se në vitin 2017, shkruan Portalb.mk.

Përmes kërkesës për qasje të lirë deri te informacionet të karakterit publik, Portalb.mk ka arritur të siguroje numrin e kërkesave për legalizim të miratuara dhe kërkesat që ende janë në pritje nga Komuna e Tetovës gjatë mandatit të dytë të kryetares Arifi.

Deri tani, janë miratuar gjithsej 3,600 kërkesa të qytetarëve për legalizim, kërkesa këto, të cilat i kanë plotësuar kushtet e nevojshme për dhënien e pëlqimit për legalizim. Edhe pse ky numër duket i lartë, nga Komuna e Tetovës thuajse kanë arritur të miratojnë kërkesat vetëm të mandatit të dytë, të cilat gjithsej kanë qenë 3,499 kërkesa.

Në vitin 2017, kryetarja Arifi e morri mandatin e dytë me premtimin se do të miratoje deri në 7 mijë kërkesa të qytetarëve, ajo këtë mandat e morri me plot 11,500 kërkesa për legalizim.

Numri i lartpëmrendur, përveç që nuk është ulur, ka pësuar rritje për rreth 3 mijë kërkesa tjera, aktualisht, në Komunën e Tetovës ka 14,496 kërkesa për legalizim, të cilat flejnë në sirtarët e komunës ndërsa qytetarët thuajse çdo ditë kalojnë në zyrat e komunës për të parë çfarë po ndodh me kërkesat e tyre.

Deri tani, Teuta Arifi nuk e mbajti premtimin e dhënë, madje as nuk ju afrua

Rikujtojmë se në debatin gjatë fushatës për zgjedhje lokale në vitin 2017, “Debat për nime” për Kallxo.com në bashkëpunim me Portalb.mk, kryetarja Arifi premtoi miratimin e 7 mijë kërkesave për legalizim.

“Me gjithë kërkesat e reja që do të vijnë nga data 1 janar, mendojmë që mund të adresojmë deri në 7 mijë kërkesa” tha Teuta Arifi në “Debat për nime”, për Portalb.mk dhe Kallxo.com në vitin 2017.

Sot që flasim, janë miratuar vetëm 3600 kërkesa për legalizim, ndërsa për të përmbushur premtimin e dhënë para qytetarëve, kryetarja Arifi do të duhet që në afat prej 8 muajsh, të miratoje gjithsej 3,400 kërkesa të qytetarëve për legalizim, këtu theksojmë se procedura për legalizim nuk është e thjeshtë dhe nuk dihet se a është e mundur që gjatë mandatit të ngelur të Arifit, të përmbushet premtimi i dhënë në debatin parazgjedhor.

Ndërkaq, nuk dihet se në cilën lagje janë kërkesat më të mëdha për legalizim, një gjë është e sigurt, se në Komunën e Tetovës asnjëherë nuk ka pasur interes kaq të lartë apo një numër të tillë të kërkesave për legalizim.