Çavkov për dhunën nga 27 prill: Nuk kisha kontakt me Janakieskin dhe Ristovskin, por me persona të involvuar në aksionin
Sot në Gjykatën Penale vazhdoi gjykimi për sulmet në Kuvend, të cilat ndodhën më 27 prill 2017, kurse në mesin e dëshmitarëve ishte edhe ish shefi i Byrosë për siguri publike (BSP), Mitko Çavkov, që për këtë rast është i dënuar me 18 vite burg, transmeton Portalb.mk.
Ai, gjatë dëshmisë tha që nuk ka pasur asnjë komunikim me ministrat e mëparshëm Mile Janakieski dhe Spiro Ristovski, por vetëm me persona të cilët kanë qenë drejtpërsëdrejti të përfshirë në ekzekutimin e aksionit policor.
Çavkov ka pranuar edhe thirrje telefonike nga Nikolla Gruevski, kurse për Aleksandar Vasilevski Ninxha deklaroi që nuk e njeh.
“Unë si koordinator i trupit për vendosje të sigurisë, për protestat veç më kisha ndërmarrë aksione dhe kontrolli ishte i vendosur,” deklaroi Çavkov i cili ka shtuar që nuk ka pasur funksion partiak, por ka qenë vetëm anëtar i VMRO-DPMNE-së.
Për hapjen e portave në Kuvend, Çavkov tha “dyert nuk janë hapur nga brenda”. Në seancën e sotme gjyqësore janë thërritur më shumë dëshmitarë, ndër të cilët edhe Emill Dimitriev dhe Kirill Bozhinovski.
Rasti për dhunën në Kuvend është në procedurë dhe e udhëheq gjykatësi Ilija Tërpkov, ndërsa përfaqësuese e palës akuzuese është Villma Ruskovska.
Të akuzuar në këtë lëndë janë ish kryetari i Kuvendit, Trajko Veljanovski, Mile Janakieski dhe Spiro Ristovski, si dhe ish drejtori i Drejtorisë për siguri dhe kundërzbulim (DSK) Vlladimir Atanasovski.
Ata janë të akuzuar që kanë kryer vepër penale “rrezikim terrorist të rregullit kushtetues dhe sigurisë”.
