RMV, Filipçe nuk është për orë policore gjatë festave të fundvitit, paralajmëroi masa për objektet hotelierike

Ministri i Shëndetësisë, Venko Filipçe, konsideron se nuk duhet të vendoset orë policore apo karantinë e plotë gjatë festave të fundvitit, sipas tij, kjo nuk do të kishte efektin e dëshiruar mirëpo nuk përjashton restrikcione tjera për objektet hotelierike, shkruan Portalb.mk.

Ai potencoi se aktualisht është në rënie numri i pacientëve të shtruar në spitale, gjë që sipas tij, vjen si pasojë e masave ekzistuese andaj nuk është e nevojshme për masa të reja shtesë.

 “Mendoj se ora policore dhe karantina nuk do të kishin efekt gjatë festave të fundvitit, për shkak se tashmë kemi masa të mira të cilat në qoftë se respektohen, do të japin efekt, dhe kjo tashmë shihet. Ne kemi reduktuar faktorin e transmetimit të virusit dhe numrin e pacienëve në spitale, në raport me atë si ishte në fillim të muajit nëntor. Ndërsa orarin e punës në vendet ku mund të grumbullohen njerëz, për këtë do të diskutohet në mbledhje” tha Filipçe në “Magazin”, televizioni Sitel.