Aksion Gueril në Tetovë: “Biletë dënimi” për çdo veturë të parkuar keq, mësoni të parkoni! (FOTO)
“Bileta dënimi” u janë vendosur veturave të parkuara keq në Tetovë nga një grup aktivistësh joformal “Art Aktivizëm”. Të njëjtit thonë se në mungesë të veprimeve konkrete nga ana e policisë për këta vetura, “janë detyruar” që punën e tyre ta realizojnë ata, shkruan Portalb.mk.
Këta aktivistë potencuan se Komuna e Tetovës nuk ka siguruar hapësira të mjaftueshme në mënyrë që qytetarët të parkohen në mënyrë të rregullt, andaj sipas tyre, është krijuar një haos në trafikun e këtij qyteti.
“Andaj, çdokush parkon kudo që mundet. Nga njëra anë, komuna nuk siguron hapësirë të mjaftueshme për parkim, dhe nga ana tjetër, nëse shoferët parkojnë gabimisht, ata ndëshkohen menjëherë
Në dy bulevardet kryesore në Tetovë, “Ilirija” dhe “Ilindeni”, trafiku zhvillohet në gjysmën e korsisë për shkak të furgonave të parkuar, taksive dhe automjeteve të tjera, gjë që bën që bllokimi i trafikut në këto rrugë të rritet” deklaruan aktivistët e “Art Aktivizëm”.
Ata theks të veçantë i vendosin edhe mungesës së dënimeve të mjaftueshme nga ana e policisë së Tetovës për këta persona që bllokojnë trotuaret duke parkuar në mënyrë jo të rregullt, andaj, të njëjtit kanë vendosur të kryejnë punën e policëve duke vendosur “Bileta dënimi” në ata vetura.
“Përveç mungesës së parkingjeve, një problem i rëndësishëm për këtë situatë është neglizhenca e disa shoferëve, të cilët, për shembull, parkojnë me vite në zonën e këmbësorëve në shesh.
Policia e trafikut nuk ndërmerr veprime për automjetet e parkuara gabimisht në trotuare ose automjete të parkuara në të dy korsitë. Prandaj, rolin e tyre e morën përsipër një grup aktivistësh nga Tetova të cilët vendosën “bileta dënimi” në automjete të parkuara keq, në mënyrë që të rrisin vetëdijen e shoferëve dhe me një apel për t’i kushtuar vëmendje sigurisë së qytetarëve dhe këmbësorëve, hapësirat e të cilëve uzurpohen nga automjete të parkuara në mënyrë të paligjshme” theksuan këta aktivistë.
Aksioni “Kujdes ku parkohesh në Tetovë!“ është i financuar nga Fondacioni Shoqëri e Hapur- Maqedoni.